Ўзбекистон Жанубий Кореядан 6 та, Чехиядан 30 та электропоезд харид қилади. Бу бўйича Президент қарори қабул қилинди.

Қайд этилишича, юқори тезликда ҳаракатланувчи 6 та электропоезд Кореянинг Hyundai Rotem компаниясидан тўғридан-тўғри шартнома асосида сотиб олинади. Шартнома 2023 йилнинг октябр ойида тузилади. Унга кўра, ноябр ойида Жанубий Корея Иқтисодий ҳамкорликни ривожлантириш жамғармасининг 35 йил муддатга, шу жумладан 10 йиллик имтиёзли муддат билан йиллик 0,1 фоиз ставкада белгиланган 185 миллион евро миқдоридаги кредити жалб қилинади.

Шунингдек, кеча, 11 октябр куни Абдулла Ариповнинг Чехияга ташрифи доирасида, Пилзен шаҳрида ушбу мамлакатнинг Škoda компанияси билан Ўзбекистонга 30 та электропоезд етказиб бериш бўйича 320 миллион долларлик шартнома имзоланган. Бу чех компаниясининг Ўзбекистонда эришган энг йирик шартномаси экани таъкидланган.

Чехия Латвия ва Эстония учун ишлаб чиқарилган кенг калибрли электропоездлар Ўзбекистон учун ҳам етказилиши кўзда тутилган. Поездларни ишлаб чиқариш Чехия ҳудудида, йиғиш эса Ўзбекистонда амалга оширилади.

«Ушбу шартнома халқаро темир йўл транспорти келажагини шакллантиришда нақадар муҳим рол ўйнашимизни тасдиқлайди ва Ўзбекистон темир йўллари билан стратегик ҳамкорликни йўлга қўяди», дейди компаниянингг Яқин Шарқ бўйича президенти Зденек Свата.

Ўзбекистонга олиб келинадиган Чехия поездлари тўртта вагондан иборат бўлиб, эни 1520 миллиметр бўлади.