Ўзбекистонда «Халқ саломатлиги посбони» кўкрак нишони таъсис этилди. Бу ҳақда Адлия вазирлигининг Huquqiy axborot Telegram-канали хабар берди.

Маълум қилинишича, янги кўкрак нишонини таъсис этиш тўғрисидаги қарор Вазирлар Маҳкамаси томонидан қабул қилинган.

Қарорга кўра, нишон билан қуйидагилар тақдирланади:

• мамлакатда соғлом турмуш тарзини умуммиллий ҳаракатга айлантиришга муносиб ҳисса қўшган барча даражадаги идора ва ташкилотлар ҳамда жамоатчилик вакиллари;
• жисмоний фаолликни кундалик одатга айлантириб, уни ўз жамоаси ва аҳоли орасида тарғиб қилишда алоҳида намуна бўлаётган шахслар ва спорт мураббийлари;
• зарарли одатларнинг олдини олиш, бартараф этиш, уларга қарши курашишда ижобий натижаларга эришган ва жамоатчилик назоратини самарали ташкил этишда фаоллик кўрсатган фуқаролар;
• аҳолинииг соғлом овқатланишини йўлга қўйиш учун етарли шарт-шароитлар яратган шахслар;
• ҳудуднинг санитария-эпидемиологик осойишталиги, атроф-муҳит тозалигини таъминлаш, аҳолида санитария-гигиеник кўникмаларни ҳосил қилиш ва мустаҳкамлаш орқали касалликларнинг олдини олишга эришган мутахассислар;
• сурункали касалликлар профилактикасида хавф омилларини бартараф этиш ва турмуш тарзини ижобий томонга ўзгартиришга ундайдиган долзарб материаллар тайёрлаган ОАВ вакиллари;
• профилактик тиббиётни ривожлантиришга ва бу йўналишда малакали кадрларни тайёрлашга муносиб ҳисса қўшган тиббиёт соҳаси ходимлари ва бошқа мутахассислар.

Кўкрак нишони билан Ўзбекистан фуқароси бўлмаган шахслар ҳам тақдирланиши мумкин. Нишон билан тақдирланганларга Базавий ҳисоблаш миқдорининг 4 баравари миқдорида (1 миллион 320 минг сўм) бир йўла тўланадиган пул мукофоти берилади.

Кўкрак нишони ҳар йили ноябр ойининг иккинчи якшанбаси – Тиббиёт ходимлари куни арафасида тантанали топширилади.

Эслатиб ўтамиз, аввалроқ Ўзбекистонда «Табиат ҳимоячиси», «Кинематография фидокори», «Фаол тадбиркор», «Сейсмик хавфсизлик соҳаси аълочиси» каби кўкрак нишонлари ҳам таъсис этилган эди.