16:10 | 07.09.23

                       

Ўзбекистонда интернетдаги товламачилик учун жиноий ва маъмурий жазо белгиланади

Қонун лойиҳаси Олий Мажлис Қонунчилик палатаси депутатлари томонидан биринчи ўқишдаёқ қабул қилинган.

Ўзбекистонда интернет орқали товламачилик, ноқонуний крипто-активлар айланмаси ва майнинги билан шуғулланганлик учун жиноий ва маъмурий жавобгарлик белгиланади. Бу бўйича Олий Мажлис Қонунчилик палатаси мажлисида «Ўзбекистон Республикасининг Жиноят ва Жиноят-процессуал кодексларига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун лойиҳаси муҳокама қилинди.

Фото: parliament.gov.uz

Мажлисда айтилишича, бугунги кунда Интернет тармоғидан фойдаланган ҳолда шахсларнинг мобил қурилмаларини ҳамда ижтимоий тармоқ ва мессенжерлардаги аккаунт ва каналларини зарарли дастур юбориш орқали блоклаш, маълумотларини ўчириш, ўзгартириш ёки олиб қўйиш билан қўрқитиб, пул талаб қилиш ёки бошқа моддий манфаатдорлик кўзланган ҳолатлар қайд этилмоқда.

«Рақамли технологиялар маконида қонунга хилоф равишда крипто-активлар айланмаси билан шуғулланиш, аноним крипто-активлар майнингини амалга ошириш ҳамда мобил қурилманинг халқаро ўзига хос идентификация кодини қонуний ишлаб чиқарувчисининг рухсатисиз ўзгартириш каби ҳуқуқбузарлик ҳолатлари кўпайиб боряпти», дейилади хабарда.

Таклиф этилаётган қонун лойиҳаси орқали бир қатор фаолиятларга нисбатан жавобгарлик белгиланади. Хусусан, интернетда товламачилик, ноқонуний крипто-активлар айланмаси ва майнинги билан шуғулланганлик учун жиноий жавобгарлик белгиланиши айтилди.

Шунингдек, мобил қурилманинг халқаро ўзига хос идентификация кодини қонуний ишлаб чиқарувчисининг рухсатисиз ўзгартириш ва ушбу мақсадда махсус дастурлар ишлаб чиқиш, ўтказиш ёки улардан фойдаланиш учун маъмурий жавобгарлик белгилаш кўзда тутилмоқда.

Ноқонуний крипто-активлар айланмаси ва майнинги билан шуғулланганлар, агар уларни тайёргарлик кўрилаётган ёки содир этилаётган жиноят ҳақида ўз ихтиёри билан арз қилган ва уни очишга фаол ёрдам берган бўлса, жиноий жавобгарликдан озод қилинади.

Қонун лойиҳаси депутатлар томонидан биринчи ўқишдаёқ қабул қилинган.

Эслатиб ўтамиз, аввалроқ Қашқадарёда фуқаронинг шахсий фото ва видеоларини тарқатиш билан қўрқитиб, 118 миллион сўмни товламачилик йўли билан олган шахс ушланганди. Тошкентда эса Telegram’да аёл номидан профиль очиб, товламачилик қилган йигит қўлга олинган. Шунингдек, Андижонда эркакнинг кийимларини ечиб ташлаб, тасвирга олган гуруҳ ушланган.

Мавзуга доир хабарлар билан танишинг: