Ўзбекистонда «Сейсмик хавфсизлик соҳаси аълочиси» кўкрак нишони таъсис этилди. Бу ҳақда ҳукумат қарори қабул қилинди.

Маълум қилинишича, «Сейсмик хавфсизлик соҳаси аълочиси» кўкрак нишони билан сейсмология, иншоотларнинг мустаҳкамлиги, аҳоли ва ҳудудларнинг сейсмик хавфсизлигини таъминлаш соҳасини ривожлантиришга муносиб ҳисса қўшган фуқаролар тақдирланади. Шунингдек, кўкрак нишони билан чет эл фуқаролари ва фуқаролиги бўлмаган шахслар ҳам тақдирланиши мумкин.

Кўкрак нишони ва унинг гувоҳномаси ҳар йили 13 октябр – Табиий офатлар хатарини камайтириш халқаро куни арафасида Фанлар академиясининг президенти ёки унинг топшириғига мувофиқ бошқа шахслар томонидан тантанали равишда топширилади.

Кўкрак нишони билан тақдирланганларга базавий ҳисоблаш миқдорининг тўрт баравари миқдорида бир йўла тўланадиган пул мукофоти берилади.

Шунингдек, бир шахс кўкрак нишони билан фақат бир марта мукофотланиши белгиланган.

Эслатиб ўтамиз, бунгача «Халқ саломатлиги посбони», «Табиат ҳимоячиси», «Кинематография фидокори», «Фаол тадбиркор», «Сейсмик хавфсизлик соҳаси аълочиси» каби кўкрак нишонлари ҳам таъсис этилган эди.