Ўзбекистондаги 14 та олийгоҳ Осиёнинг топ-1000 талиги рўйхатига киритилди. Бу ҳақда Олий таълим, фан ва инновациялар вазирлиги матбуот хизмати хабар берди.

Малайзиянинг Куала-Лумпур шаҳрида ўтказилаётган QS Higher Education Summit Asia Pacific 2023 саммити доирасида 2024 йил учун эълон қилинган рейтингдан Ўзбекистоннинг 6 ҳудудидаги қуйидаги 14 та олийгоҳ ўрин олган.

• Тошкент ирригация ва қишлоқ хўжалигини механизациялаш муҳандислари институти — 249-ўрин;
• Ўзбекистон миллий университети — 301-350-ўрин;
• Тошкент давлат иқтисодиёт университети — 405-450-ўрин;
• Тошкент давлат техника университети — 501-550-ўрин;
• Самарқанд давлат университети — 601-650-ўрин;
• Тошкент ахборот технологиялари университети — 651-700-ўрин;
• Тошкент давлат аграр университети — 651-700-ўрин;
• Тошкент молия институти — 701-750-ўрин;
• Жиззах политехника институти — 751-800-ўрин;
• Наманган муҳандислик-технология институти — 751-800-ўрин;
• Тошкент давлат педагогика университети — 751-800-ўрин;
• Тошкент давлат шарқшунослик университети — 801+ ўрин
• Қорақалпоқ давлат университети — 801+ ўрин
• Фарғона политехника институти — 801+ ўрин

2023 йилда халқаро тан олинганлик даражаси, илмий-тадқиқотлар ривожи, таълим сифати, халқаро ҳамкорлик, академик мобиллик соҳалари бўйича Осиё олийгоҳлари рейтингида 25 та давлатдан 856 та олийгоҳ иштирок этган.

Бунда Ўзбекистоннинг 3 та олийгоҳи: Ўзбекистон миллий университети, Тошкент ирригация ва қишлоқ хўжалигини механизациялаш муҳандислари институти, Тошкент давлат иқтисодиёт университети «Академик обрў» кўрсаткичи бўйича энг яхши 200 та ОТМдан бири бўлган. Ўзбекистон миллий университети «Академик обрў» бўйича нисбатан етакчи бўлиб, 135-ўринда қайд этилган. Мазкур кўрсаткич бўйича 7 та ОТМ ўз ўрнини яхшилашга эришган. «Иш берувчилар ўртасидаги обрў» кўрсаткичи бўйича Тошкент ирригация ва қишлоқ хўжалигини механизациялаш муҳандислари институти 208-ўрин, «Профессор-ўқитувчилар ва талабалар нисбати» кўрсаткичи бўйича 124-ўринни эгаллаган.

Шунингдек, бошқа бир қатор кўрсаткичлар бўйича юқорида номи саналган олийгоҳлар Осиёда юқори ўринларда қайд этилган.