Статистика агентлиги берган маълумотларга кўра, 2023 йилнинг январ-cентябр ойларида Ўзбекистоннинг ташқи савдо айланмасида юқори улушга эга бўлган давлат Хитой деб топилган ва ушбу мамлакатнинг савдодаги улуши 9,5 миллиард АҚШ долларини ташкил қилган.

Шунингдек, дастлабки учталикни етти ва 3,2 миллиард доллар билан Россия ҳамда Қозоғистон банд қилган.

Бундан ташқари, Туркия 2,4 миллиард, Жанубий Корея 1,7 миллиард, Туркманистон 830,3 миллион, Германия 784,2 миллион, Қирғизистон 754 миллион АҚШ доллари миқдорида улушга эга бўлган. Топ-10 таликни эса 659 миллион доллар билан Франция ва 615,3 миллион доллар билан Афғонистон якунлаб берган.

Эслатиб ўтамиз, аввалроқ Ўзбекистоннинг асосий ташқи савдо ҳамкорлари рўйхати эълон қилинганди. Шунингдек, Россия ва Хитой Ўзбекистоннинг 2022 йилда асосий савдо ҳамкори бўлганди. Бундан ташқари, Президент Шавкат Мирзиёев Тошкентда бўлиб ўтган ИҲТ доирасида савдони соддалаштириш тўғрисидаги битимни қабул қилишни таклиф қилганди.