Ижтимоий тармоқларда Жиззах вилоятида катта ҳажмдаги юк машинаси мунтазам Йўл-патрул хизмати масканида тиқилиб қолгани ҳақида хабарлар пайдо бўлди. Йўл ҳаракати хавфсизлиги хизмати ҳолат юзасидан муносабат билдирди.

Маълум қилинишича, Жиззах вилояти, Зомин туманидан ўтувчи халқаро аҳамиятдаги А-376 автомобил йўлида жойлашган «Яккабоғ-15» мунтазам ЙПХ масканидан катта ҳажмдаги юк ортилган транспорт воситаси ҳаракатланиб ўтаётган вақтда мазкур жараён атрофдаги фуқаролар томонидан тасвирга олинган.

Ушбу видео эса тармоқларда гўёки юкнинг тепа қисми ЙПХ масканидаги устунга тегиб қолганлиги ҳақидаги изоҳлар билан тарқатилган.

ЙҲХХнинг билдиришича, бундай хабарлар асоссиз бўлиб, юк машинаси ЙПХ постидан ҳаракат хавфсизлиги таъминланган ҳолда, масъул ходимларнинг назорати остида эҳтиёткорлик билан олиб ўтилаётган бўлган. Ўтказиш жараёнида атрофдаги бирор жиҳоз ёки ортилган юкка зиён етмаган.

«Ижтимоий тармоқдаги айрим саҳифа эгаларидан ҳар қандай ҳолат ва жараён тўғрисида асосли ва тўлиқ маълумотга эга бўлмай туриб, турли изоҳлар билан тарқатмасликларини сўраймиз», дейилади хабарда.

Эслатиб ўтамиз, аввалроқ Ҳиндистонда самолёт пиёдалар кўприги остида тиқилиб қолганди.