2022 йилнинг январь-июль ойларида Ўзбекистонга 9 та давлатдан қиймати 116,4 миллион долларга тенг бўлган 26,9 минг тонна қорамол гўшти импорт қилинган. Бу ҳақда Давлат статистика қўмитаси хабар берди.

Қайд этилишича, қорамол гўшти импорти ўтган йилнинг мос даври билан солиштирилганда 10,5 минг тоннага ошган. 2022 йилнинг етти ойи давомида мамлакатга қорамол гўшти асосан Беларус (14,4 минг тонна) ва Қозоғистондан (9,1 минг тонна) олиб келинган. Шунингдек, қуйидаги давлатлардан ҳам қорамол гўшти импорти амалга оширилган:

• Бразилия – 1,3 минг тонна;
• Ҳиндистон – 784 тонна;
• Россия – 604 тонна.

Эслатиб ўтамиз, 4 март куни Ўзбекистон ва Покистон ўртасида имтиёзли савдо тўғрисидаги битим имзоланган эди. Шавкат Мирзиёев ва Покистон бош вазири Имрон Хон товар айирбошлаш ҳажмини 500 миллион долларга етказиш имконияти борлигини таъкидлаб, Трансафғон темир йўлини янада ривожлантиришга келишиб олганди. Шу ойнинг ўзида Покистондан 40 минг долларлик гўштнинг биринчи партияси Тошкентга олиб келинган эди.