Тайван 5 сентябрь куни Хитой ҳарбий разведкачи дрони ўзининг ҳаво мудофаа зонасига кирганини маълум қилди. Бу ҳақда «Al Arabiya» хабар берди.

Тайпей Мудофаа вазирлиги томонидан «BZK-007» деб аниқланган дрон саккизта Хитой ҳарбий самолёти билан бирга оролнинг ҳаво мудофаа зонасининг жануби-ғарбий бурчагини кесиб ўтган. Хитой сўнгги икки йил ичида Тайваннинг жануби-ғарбий ҳаво ҳудудига киришни кескин оширган. Аммо ҳарбий дронлардан фойдаланиш камдан-кам ҳолатларда учрайди.

Тайван ҳарбийлари бундай ҳолатни охирги марта 2020 йил октябрда, Хитой парвозлари частотаси ҳақидаги маълумотларни эълон қила бошлаганидан бир ой ўтиб аниқлаганди.

Шу билан бирга, 5 сентябрдаги ҳодиса тайванлик аскарларнинг ўтган ҳафта Хитой учувчисиз учиш аппаратини уриб туширганидан кейин содир бўлган. «BZK-007» узоқ масофаларга парвозларни амалга ошириши мумкин бўлган мураккаб разведка дрони ҳисобланади.

Аввалроқ Тайван биринчи марта Хитой қирғоқлари яқинида дронни уриб туширганди. Шунингдек, Хитой АҚШдан Тайван билан алоқаларни тўхтатишни талаб қилганди.