13 ноябрь куни АОКАда ҳафталикка бағишланган матбуот анжумани ўтказилди. Анжуманда Инновацион ривожланиш агентлиги раҳбари Шароф Ражаббаев ҳамда Агентлик масъуллари иштирок этди.

Анжуманда қайд этилишича, «InnoWeek.Uz-2024» ҳафталигида Хитой, Малайзия, Ҳиндистон, Эрон, Туркия, Германия ва Россия каби давлатларнинг 150 дан зиёд вакиллари, шунингдек, олий мартабали меҳмонлар қатнашади.

Ҳафталик доирасида 512 та маҳаллий ва 34 та хорижий ташкилотлар иштирокида халқаро инновацион маҳсулотлар кўргазмаси ўтказилади. Унда «Тижоратлаштириш», «Стартап» ва «Илмий тадқиқот» лойиҳалари натижалари намойиш этилади. Шунингдек, 22 та халқаро форум ва семинарлар дастурга киритилган.

Ҳафталик хорижий ва маҳаллий экспертлар учун инновациялар ва илм-фан соҳасидаги янгиликлар билан ўртоқлашиш ҳамда тажриба алмашиш учун муҳим майдон ҳисобланади. Инвесторларни жалб этиш ва минтақавий ҳамкорликни кенгайтириш учун имконият яратилади.

Ҳафталик давомида илмий тадқиқотлар соҳасида ҳамкорлик лойиҳалари муҳокама қилиниб, янги инновацион ғояларни амалга ошириш учун шартномалар имзоланиши кутилмоқда.