Айни кунларда ёшларга оид ҳаёт талаби ва тарбия услублари ўртасида қандайдир заифлик, психологик бўшлиқ кўзга ташланмоқда. Ушбу бўшлиқни тўлдириш учун халқимизнинг бебаҳо анъаналари, ҳаракатли ўйинларини ўзида жамлаган турли хил мусобақалар, спорт беллашувлари ўтказиб турилиши талаб этилади.

Бугун шу мақсадда футбол ва мини футбол буйича «ДХХ Кубоги» Тошкент шаҳар босқичининг очилиш маросими бўлиб ўтди.

Аҳолида, хусусан, ёшларда жисмоний тарбияга бўлган мотивация, эҳтиёж ҳамда интилишларни кучайтириш кўзланган мазкур мусобақалар, президентимизнинг ёшларга оид ва спортни ривожлантиришга қаратилган фармон ва қарорлари, пойтахтимиз туманларига ташрифлари чоғида берилган кўрсатмалари ижросини таъминлаш, ёшларни ҳар томонлама қўллаб-қувватлаш ҳамда уларни рағбатлантириш учун ташкил этилган.

Таъкидлаш жоизки, ўтган мавсумда ўтказилган мусобақаларда 100 мингдан ортиқ аҳоли қамраб олиниб, уларнинг 15 минг нафардан кўпроғи футбол ва мини футбол уйинларида иштирок этишиб, яхши натижаларни қайд этишган.

Шунингдек, мазкур спорт турлари бўйича 2023 йили Тошкент шаҳридаги 585 та маҳалланинг 16-30 ёш оралиғида бўлган иштирокчилари жамоаларга бўлинган ҳолда иштирок этишган. Эътиборлиси, мазкур ўйинларга фақатгина ўғил болалар эмас, қизлардан иборат жамоалар ҳам қамраб олинганидир. Хусусан, ўғил болалар ўртасида ўтказилган мини футбол мусобақасида 1- ўринни Шайхонтоҳур тумани эгаллаган бўлса, қиз болалар жамоасидан биринчиликни Чилонзор тумани қўлга киритган. Янгиҳаёт тумани шарафини ҳимоя қилган ўғил болалар жамоаси эса футбол мусобақасида ғолибликни қўлга киритишган.

Ўйин шартлари жуда оддий: иштирокчи ўзи истиқомат қиладиган маҳаллада икки йилдан кам бўлмаган муддатда яшаган ва профессионал футбол билан шуғулланмаган бўлиши лозим. Мақсад, ёшлар орасида спорт билан шуғулланишни кундалик турмуш тарзига айлантириш.

Билдирилишича, аввалги мавсумларда фаол иштирок этган ёшлардан айримларига профессионал футбол кулубларидан ҳам таклифлар тушган. Бу йилги мавсумда эса 16 ёшдан 30 ёшгача бўлган ёшларимиз мусобақаларда иштирок этишлари мумкинлиги алоҳида айтиб ўтилди.

Хулоса шуки, маҳаллаларда футбол мусобақалари ривожланиши давлатимизда олиб борилаётган ислоҳотлар билан узвий ҳамоҳангдир. Боиси катта йўлга чиққан халқнинг вужуди соғлом, руҳи уйғоқ бўлиши керак. Шу тариқа, мамлакатимизда жисмонан соғлом ва бақувват бўлган аҳоли сони ошиб, соғлом турмуш тарзига бўлган дунёқарашимиз ижобий шаклланиб бораверади.