Экология, атроф-муҳитни муҳофаза қилиш ва иқлим ўзгариши вазирлиги хазонрезгилик мавсумида шох-шабба ва тўкилган япроқларни ёқмасликка, агар шундай ҳолатлар кузатилса, зудлик билан хабар бериши кераклиги хусусида аҳолини огоҳлантирди. Бу ҳақда вазирлик матбуот хизмати хабар берди.

«Куз фасли келиши билан хазонрезги мавсуми бошланиб, шаҳримиз аҳолиси яна бир муаммога – тўкилган барглар ва кесилган шох-шаббаларнинг ёқиб юборилаётганига дуч келади» дейилган вазирлик хабарида.

Маълумот учун, тўкилган баргларни ёки шох-шаббаларни ёқиш ҳуқуқбузарлик ҳисобланади ҳамда Маъмурий жавобгарлик тўғрисидаги кодексга мувофиқ базавий ҳисоблаш миқдорининг 10 баробаригача, яъни 3,3 миллион сўмгача жарима солинишига сабаб бўлади.

Шунингдек, сомон ёқилиши сабабли ушбу ердаги тупроқ унумдорлигининг камайиши оқибатида етказилган зарар суммаси мажбурий тартибда ундирилади.

Вазирлик фуқаролардан бундай ҳолатларга дуч келган тақдирда 11-57 ишонч рақамига қўнғроқ қилиб, хабар беришларини ёки @ecogovuz_bot телеграм ботига мурожаат қилишларини сўраган.

Эслатиб ўтамиз, аввалроқ Самарқандда Марказий Осиё ёшлар экологик оромгоҳи байроғини кўтариш маросими бўлиб ўтиб, унда Экология вазири Азиз Абдуҳакимов ҳам иштирок этгани ҳақда хабар берилганди.