30 ноябр куни Тошкент—Абу-Даби йўналиши бўйича Wizz Air авиакомпанияси орқали БААга учиб келган 31 нафар ўзбекистонлик амирликлар ҳудудига киритилмади. Ўзбекистоннинг Абу-Даби шаҳридаги элчихонаси ва Дубайдаги Бош консулхонаси вазиятни назоратга олиб, аэропорт маъмурияти билан ҳамкорликда йўловчиларни овқат ва тиббий ёрдам билан таъминлаш чораларини кўрмоқда.

Газета.uz нашри маълумотига кўра, аёллар, болалар ва кексаларга аэропортдан чиқиб кетишга рухсат берилган, лекин 20–40 ёш оралиғидаги эркаклар мамлакатдан чиқариб юборилиши мумкинлиги айтилмоқда. Фуқароларнинг айтишича, паспортлари олиб қўйилиб, изоҳ берилмаган ҳолда узоқ вақт куттирилган.

Элчихона вазиятни ҳал этиш учун амирликлар мутасадди идоралари билан мулоқотда эканини маълум қилди. Сабаблар ҳақида расмий баёнот берилмаган.