Ўзбекистон Президенти Шавкат Мирзиёев 18 июн куни Эронга ташриф буюради. Бу ҳақда Эрон Савдони ривожлантириш ташкилоти Марказий Осиё, Россия ва Кавказ бўйича департаменти бош директори Раҳматолла Хормали Тошкентда тадбиркорлар билан учрашувда айтиб ўтганлиги хабар берилмоқда.

Унинг сўзларига кўра, ташриф чоғида Теҳронда икки давлат ишбилармон доиралари, тадбиркорлар ва бизнес эгалари иштирокида бизнес-форум бўлиб ўтади.

2022 йил сентябр ойида Эрон Президенти Иброҳим Раиси расмий ташриф билан Ўзбекистонга келган эди. Шавкат Мирзиёев ва Иброҳим Раиси Самарқандда бўлиб ўтадиган ШҲТ саммити олдидан музокара ўтказган. Эрон президентининг мамлакатга ташрифи сўнгги 20 йилдаги биринчи ташриф бўлди. Шунингдек, Иброҳим Раиси Шавкат Мирзиёевга ўзи учун қулай вақтда Эронга ташриф буюришни таклиф қилганди.

Эслатиб ўтамиз, Ўзбекистон ва Эрон муносабатлари сўнгги йилларда янги босқичга кўтарилган. Ўзбекистон томони Эрон ҳудуди орқали денгиз савдо йўлларига чиқишдан умидворлиги икки давлатнинг муносабатлари илиқлашувига сабаб бўлаётгани таҳмин қилинмоқда.