Президент Шавкат Мирзиёев кеча, 28 сентябр куни Германия канцлери Олаф Шолцнинг таклифига биноан ушбу мамлакатга ташриф буюрди. Бу ҳақда давлат раҳбарининг матбуот хизмати хабар берди.

Қайд этилишича, «Берлин-Бранденбург» халқаро аэропортида Шавкат Мирзиёевни Берлин федерал ўлкаси ички ишлар, рақамлаштириш ва спорт вазири Ирис Шпрангер ва бошқа расмий шахслар кутиб олган.

Президент бугун, 29 сентябр куни Марказий Осиё ва Германия давлат раҳбарлари саммитида иштирок этади, президент Франк-Вальтер Штайнмайер ва канцлер Олаф Шолц билан музокаралар ўтказади.

Германия федерал ҳукумати Матбуот ва ахборот департаментига кўра, ўзаро мулоқот чоғида икки томонлама муносабатлар, иқтисодий ва энергетика сиёсати соҳасидаги ҳамкорлик каби кенг кўламли мавзулар муҳокама қилиниши режалаштирилган.

Шунингдек, ташриф дастуридан ишбилармонлик тадбирлари ҳам ўрин олган.

Эслатиб ўтамиз, аввалроқ Шавкат Мирзиёев АҚШга ташриф буюриб, C5+1 форматидаги саммитда иштирок этганди.