Тошкент туманида 8 апрель куни чақирувга чиққан ИИБ ходими пичоқланди, деб хабар бермоқда Тошкент вилояти ИИББ.

Маълум бўлишича, соат 21:30 ларда фуқаро Ж.Р. (1980 йилда туғилган) профилактика инспектори Мурод Халиқовнинг телефон рақамига қўнғироқ қилиб, акаси Ж.Қ. (56 ёшли) билан оилавий жанжал содир бўлаётганини айтган.

Воқеа жойига борган инспектор хонадон дарвозаси олдида қўлида ошхона пичоғи ушлаб турган Ж.Қ.ни кўрган ва ундан қуролни ташлашни сўраган. Аммо у инспекторнинг қонуний талабини бажармай, фаол қаршилик кўрсатган ва пичоқ билан Мурод Халиқовнинг чап бел қисмига бир марта уриб, жароҳат етказган, — дейилади Тошкент вилоят ИИББ хабарида.

Жароҳат олган профилактика инспектори ИИВ Марказий госпиталига ётқизилган.

Ҳолат юзасидан инспекторни пичоқлаган эркакка нисбатан Жиноят кодексининг 219-моддаси 2-қисми (Хизмат вазифасини бажариш ёки фуқаровий бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилган ҳолда ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, қамоққа олиш тарзидаги эҳтиёт чораси қўлланган.

Қайд этиш керак, ушбу жиноятни содир этганликда айбдор деб топилган шахс уч йилдан беш йилгача озодликни чеклаш ёки уч йилдан беш йилгача озодликдан маҳрум қилиш билан жазоланади.