Исақов Асқар Шарифжанович «Ўзтрансгаз» АЖ бошқаруви раиси вазифасини бажарувчиси этиб тайинланди. Бу ҳақда Энергетика вазирлиги Матбуот хизмати хабар берди.

Исақов бунга қадар Энергетика вазирлиги ҳузуридаги Электр энергияси, нефт маҳсулотлари ва газдан фойдаланишни назорат қилиш инспекцияси бошлиғи ўринбосари лавозимида ишлаган.

«Ўзтрансгаз» мамлакат газ узатиш тизимининг оператори бўлиб, табиий газни ички бозорга ташиш, шунингдек, Ўзбекистондан газ экспорти ва транзитини таъминлайди.

Маълумот ўрнида, 2021 йилда «Ўзтрансгаз» АЖга Улуғбек Сайидов лавозимидан озод этилиб, ўрнига энергетика вазирининг собиқ ўринбосари Беҳзод Норматов бошқарув раиси этиб тайинланганди.

2022 йил декабрида энергетика таъминотидаги камчиликлар туфайли соҳанинг бошқа масъуллари қаторида унга ҳам ҳайфсан жазоси берилади.

2023 йил январида эса, мамлакатдаги энергетик инқироз фонида у «Ҳудудий электр тармоқлари» раҳбари Улуғбек Мустафоев ва «Ўзбекнефтгаз» раҳбари Меҳриддин Абдуллаев билан биргаликда лавозимидан озод этилиб, уларга вазифасини бажарувчи лавозимида 3 ой синов муддати белгиланганди.