Бугун, 22 январ куни Фарғона вилоятининг Фарғона шаҳридаги ёнилғи сақлаш омборида ёнғин чиқди. Вилоят ФВБнинг маълум қилишича, ёнғин шаҳардаги «NEFT OIL» МЧЖда содир бўлган.

Келтирилишича, шаҳарнинг Тўқай кўчасидаги ушбу ёнғинни ўчиришга 12 та қутқарув экипажи жалб қилинган. Ёнғин бўйича соат 15:18 да вилоят ФВБга хабар келиб тушган. 12 та ёнғин қутқарув экипажи соат 15:26 да воқеа жойига етиб борган. 40 дақиқалик жараёндан сўнг, ёнғин соат 16:08 да тўлиқ қуршаб олинган ва соат 16:14 да батамом ўчирилган.

Вилоят ФВБ бахтсиз ҳодиса оқибатида жабрланганлар ва жароҳат олганлар йўқлигини, бошқарма айни вақтда ёнғиннинг келиб чиқиш сабаби ва зарар миқдорини аниқлаётганини қўшимча қилган.

Аввалроқ, Андижондаги суюлтирилган газ балонлари сақланувчи омборда ёнғин чиққани ҳақда хабар берилганди.