Россия бош вазири Михаил Мишустин 1 мартдан бензин экспортига вақтинча тақиқ қўйиш тўғрисидаги таклифни маъқуллади. Бу ҳақда «РБК» хабар берди.

Қайд этилишича, мавсумий талабнинг ошиши фонида бензин экспортини вақтинчалик тақиқлаш 1 мартдан кучга киради. Бундан ташқари, биржада дизель ёнилғисини сотишнинг оширилган стандарти жорий этилмоқда.

Бош вазир Михаил Мишустин 2024 йил 1 мартдан бошлаб олти ой муддатга бензин экспортини тақиқлашни маъқуллаган. Шунингдек, биржада дизель ёнилғисини сотиш стандартини 16 фоизга ошириш тўғрисида қарор қабул қилинган.

Қўшимча қилинишича, вақтинчалик экспорт тақиқи ЕОИИ мамлакатлари, Мўғулистон, Ўзбекистон, Абхазия ва Жанубий Осетияга келишилган етказиб бериш ҳажмларига тааллуқли эмас.

Аввалроқ «UNG Petrо» ёнилғи қуйиш шохобчаларида 26 февралдан Аи-80 маркали бензин нархи 200 сўмга кўтарилиб, 7000 сўм этиб белгиланганди. «Ўзбекнефтгаз» буни импорт бензини қимматлагани билан боғлиқ экани билан изоҳлаган.