Шавкат Мирзиёев Россияга давлат ташрифи билан боргани ҳақида хабар берилган эди. Давлат раҳбари ташриф доирасида кеча, 6 октябр куни Владимир Путин билан биргаликда кенг кўламли стратегик шериклик ва иттифоқчилик муносабатларини чуқурлаштириш тўғрисида қўшма баёнот қабул қилди. Унга кўра, Самарқандда Россия бош консулхонаси очиладиган бўлди. Бу ҳақда Ўзбекистон Президентининг матбуот хизмати хабар берди.

Маълум қилинишича, давлат раҳбарлари ҳузурида икки мамлакат ҳукуматлари ва вазирликлари томонидан имзоланган 10 та ҳужжат алмашилган. Самарқандда Россия бош консулхонасини очиш, ваколатли иқтисодий оператор институтларини ўзаро тан олиш, «Агроэкспресс» тезкор темир йўл ташувларини ташкил этиш лойиҳасини амалга ошириш тўғрисидаги битимлар, Ташқи ишлар вазирликлари ўртасида 2024-2025 йиллар учун ҳамкорлик дастури, шунингдек, транспорт, илм-фан, таълим ва маданият соҳаларида ҳамкорлик бўйича ҳужжатлар шулар жумласидандир.

Мазкур келишувлар икки мамлакат ўртасидаги ҳамкорликни бир қатор истиқболли йўналишларда янада мустаҳкамлашга хизмат қилиши таъкидланган.

Эслатиб ўтамиз, аввалроқ Россиядан Ўзбекистонга газ етказиб бериш 2023 йилнинг 7 октябридан бошланиши маълум қилинганди.