Аввалроқ, Ўзбекистон Президенти Шавкат Мирзиёев Россия раҳбари Владимир Путиннинг таклифига биноан ушбу мамлакатга жўнаб кетгани хақида хабар берилганди.

Россия президенти Владимир Путин Президент Мирзиёев билан урашувда Россия газининг Қозоғистон орқали Ўзбекистонга етказиб берилишини маълум қилди. Бу ҳақда ТАСС хабар берди.

Унга кўра, шу муносабат билан Президент Путин эртага, 7 октябр куни ҳар уч давлат раҳбарлари иштирокида тантанали маросим ўтказилишини эълон қилган.

«Эртага Президент Шавкат Миромонович ва Президент Қосим-Жомарт Кемелевич билан биргаликда «Газпром» томонидан Ўзбекистонга Россия газини етказиб бериш бўйича тантанали маросимда иштирок этамиз» деган Путин.

Унинг таъкидлашича, Россия газининг бундай йўсинда етказиб берилиши бу транспорт тизимлари мавжуд бўлган бутун тарихда биринчи марта амалга ошириляпти. Чунки, Россияда ишлаб чиқарилган ва Россиядан келиб чиққан газ ҳеч қачон Марказий Осиёга юборилмаган. Ушбу лойиҳани амалга ошириш бўйича келишув эса бир неча ой олдин тузилган.

«Ўзбекистон, Россия ва Қозоғистон расмийлари қисқа вақт ичида рекорд даражада ҳаракат қилишди ва бу ҳаракат газнинг етказиб берилиши учун шароит яратиб берди. Ёқилғининг бир қисми эса Қозоғистонга етказилади. Ушбу ўзаро манфаатли муҳим лойиҳа Ўзбекистон ва Қозоғистон орқали бутун Марказий Осиё минтақасининг энергетика хавфсизлигига ҳисса қўшади» деган Путин.

Шунингдек, Путин «Россиянинг йирик энергетика компаниялари Ўзбекистон бозорида узоқ вақт ва самарали фаолият юритиб келаётгани»га эътибор қаратган. Бунга мисол тариқасида Россия президенти «Лукойл», «Татнефт» ва «Зарубежнефт» компанияларини кўрсатган.

«Биз гидроэнергетика, шунингдек, тинч атом энергетикаси соҳасида ҳамкорлик қилиш учун яхши истиқболларни кўрмоқдамиз» деган Россия президенти.

Бундан ташқари, Президент Путин Россия кўмагида Ўзбекистонда Тошкент металлургия заводи, рус автомобилларини йиғиш корхоналари, саноат технопарклари қурилганини, Россияда тўлиқ лойиҳалаштирилган ва ишлаб чиқилган «Атом» электромобилини ишлаб чиқаришни йўлга қўйиш имконияти яратилаётганини эслатиб ўтган.