Самарқандда 23 ёшли аёлини кетмон билан уриб ўлдирган эр 19 йилга қамалди. Бу ҳақда «Миллар» информацион дастурида маълум қилинди.

Аниқланишича, ҳолат 2024 йил 14 июль куни соат 21:00 атрофида Ургут тумани «Ғойиб ота» маҳалласида содир бўлган. Оилавий келишмовчилик сабаб келиб чиққан жанжал ўлим билан тугаган. Марҳуманинг яқинларига кўра, жанжалга аёлнинг қошини бўягани сабаб бўлган.

Ҳозирда оиланинг 2 нафар фарзанди онасиз қолган. Эр суд мажлисида билмай қилган жинояти учун кечирим сўраган. Марҳуманинг отаси эса умрбод қамоқ жазоси талаб қилган. Судда йиғилган ҳужжатлар кўриб чиқилди. Айбланувчи Жиноят кодексининг 97 моддаси 2 қисми ж банди билан айбдор деб топилиб, 19 йилга озодликдан маҳрум қилинди.