Тошкентда бугун, 12 октябр куни Бош прокуратура ҳузуридаги Департаментнинг Яшнобод тумани бўлими томонидан Давлат хавфсизлик хизмати ва Ички ишлар бўлими билан ҳамкорликда ўтказилган тезкор тадбирда фуқаро Э.Ҳ. фуқаро А.Д. га 200 дона 200 минг сўмлик қалбаки пулларни сотаётганда ашёвий далиллар билан ушланган. Бу ҳақда Бош прокуратура матбуот хизмати хабар берди.

Маълумотларга кўра, фуқаро Э.Ҳ. 18 миллион сўмга 40 миллион сўм қийматидаги қалбаки пулларни сотмоқчи бўлган.

Мазкур ҳолат юзасидан Жиноят Кодексининг 176-моддаси ( қалбаки пул, акциз, маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, Жиззах, Самарқанд ва Бухорода 460 миллион сўмдан ортиқ қалбаки пуллар мусодара қилингани ҳақида хабар қилинганди.