Бош прокуратура ҳузуридаги Иқтисодий жиноятларга қарши курашиш департаментининг хабар беришича, икки вилоятда банкдан олинган кредитлар ўзлаштириб юборилган. Департаментнинг Термиз шаҳар бўлими «Микрокредитбанк» АТБ мурожаати асосида ўтказган терговга қадар текширувда, оилавий корхона раҳбари ва бошқалар тикувчиликни ривожлантириш учун ажратилган 622,9 млн сўм имтиёзли кредит эвазига тикув дастгоҳлари сотиб олмаган ва маблағларни ўзлаштириш йўли билан талон-торож қилган.

Шунингдек, банкнинг Front-ofis бўлими собиқ бошлиғи ушбу мақсадсиз ишлатилган кредит қарздорликни тўлаш учун янги хўжалик субъекти ташкил этган. У кредит олиб бериш эвазига корхона раҳбарининг 30 млн сўм нақд пулини фирибгарлик йўли билан қўлга киритган.

Шу каби ҳолат Фарғонада ҳам юз берган. Департаментнинг Фарғона туман бўлими томонидан ўтказилган терговга қадар текширувда оилавий корхона раҳбари ва бошқалар ҳудудий тижорат банки филиалидан 23 нафар фуқарога иссиқхона қуриш ва чорва моллари етказиб бериш учун ажратилган 620 млн сўм имтиёзли кредит маблағларини ҳужжатларни сохталаштириш йўли билан талон-тарож қилганликлари аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 168-моддаси (фирибгарлик), 209-моддаси (мансаб сохтакорлиги) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.