Қозоғистоннинг Жамбил вилоятида 12 май куни ичида ўзбекистонликлар бўлган автобус ҳайдовчиси бошқарувни йўқотиб, йўл-транспорт ҳодисаси содир қилганди. Ўзбекистон Ташқи ишлар вазирлиги ахборот хизмати ҳолат юзасидан қўшимча маълумот берди.

Маълум бўлишича, Нукус–Олмаота йўналиши бўйича ҳаракатланган автобусда 53 нафар йўловчи, жумладан, 47 нафар Ўзбекистон фуқароси бўлган. Ҳодиса оқибатида 2 нафар ўзбекистонлик ҳалок бўлган.

Ҳозирда 16 нафар йўловчи туман касалхонасида, жумладан 2 нафари жонлантириш бўлимига ётқизилган. Ўзбекистоннинг Олмаотадаги Бош консуллиги ҳузурида жабрланганларга ёрдам кўрсатишни ташкил этиш бўйича штаб тузилди. Ҳалок бўлганларнинг жасадларини ватанига олиб боришнинг ташкилий масалалари ҳал этилмоқда.

Аввалроқ об-ҳаво шароитининг ёмонлашиши (ёмғир ва дўл ёғиши) сабаб автобус ҳайдовчиси руль бошқарувини йўқотиб, худди шу йўналишда ҳаракатланаётган трактор тиркамаси билан тўқнашиб кетгани хабар қилинганди.