Ўзбекистонда жамоат жойларида шахсни идентификация қилиш имконини бермайдиган даражада юзни ёпиб юриш жавобгарликка сабаб бўлиши мумкин. Бу ҳақдаги қонун лойиҳаси Олий Мажлис Қонунчилик палатаси депутатлари томонидан қабул қилинди.

Маълум қилинишича, юзни ёпиб юрганлик учун белгиланган жавобгарликни истисно қилувчи ҳолатлар ҳам мавжуд бўлиб, улар қуйидагилардан иборат:

• тиббий кўрсатма асосида ҳаракатланаётган шахслар;
• меҳнат ва хизмат фаолияти билан боғлиқ ҳолатда ҳаракатланаётган шахслар;
• йўл-транспорт ҳаракатида хавфсизликни таъминлаш учун махсус бош кийим кийган шахслар;
• спорт ва маданий тадбирлар пайтида иштирокчи сифатида қатнашаётган шахслар ҳамда қонунчиликда рухсат этилган бошқа ҳолатларда юзини тўсган ҳолда бўлиш ҳолати белгиланмоқда.

Хабарда айтилишича, бу каби жавобгарлик чоралари бир қатор хорижий давлатларда, жумладан Франция, Австрия, Дания, Белгия, Болгария, Швейцария, Туркия, Марокаш, Қозоғистон, Ҳиндистон, Индонезия каби мамлакатларда ҳам қўлланилган.

Шунингдек, қонун лойиҳасининг қабул қилиниши жамиятда миллатлараро тотувликни, диний бағрикенгликни мустаҳкамлаш, хотин-қизлар ва болалар ҳуқуқларини ишончли ҳимоя қилишга ҳамда жамоат тартибини сақлаш бўйича кўрилаётган саъй-ҳаракатларнинг самарадорлигини оширишга хизмат қилиши айтилган.

Муҳокамалар давомида қонун лойиҳасидаги айрим нормалар юзасидан бир қатор саволлар ўртага ташланган. Лойиҳани такомиллаштириш ва пухта ҳолга келтириш бўйича фикр-мулоҳазалар, таклиф ва тавсиялар билдирилган.

Қонун лойиҳаси депутатлар томонидан қабул қилинган.

Эслатиб ўтамиз, бугунги мажлисда, шунингдек, кўпхотинлик масаласига ҳам алоҳида тўхталиб ўтилган. Депутатлар томонидан тайёрланган қонун лойиҳасида мамлакатда икки ва ундан ортиқ хотин билан эр-хотин бўлиб яшашни тарғиб қилганлик, хотин-қизлар ва эркаклар тенг ҳуқуқлилигини очиқдан-очиқ инкор этганлик учун маъмурий жавобгарлик белгиланмоқда.