Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Баъзи бензин турларининг нархи 8100 сўмдан ошди. Энергетика вазирлиги бунга сабаб қилиб чакана нархнинг давлат томонидан назорати бекор бўлганини келтирди.

Ўзбекистонда бензин сифатсиз экани ҳамда маҳсулотнинг нархи ошгани (хусусан, 1 литр АИ-91 бензини 8100 сўмга кўтарилгани) ҳақида хабарлар тарқалди. Энергетика вазирлиги ахборот хизмати ҳолат юзасидан изоҳ берди.

Вазирликнинг муносабатига кўра, автомобиль бензинининг чакана нархини давлат томонидан тартибга солиш бекор қилинган ва маҳсулотларни нефтни қайта ишлаш заводлари томонидан сотиш фақат биржа савдоси орқали амалга оширилиши белгиланган. Жумладан:

• 2017 йил 15 ноябрдан бошлаб АИ-92, АИ-93, АИ-95 ва АИ-98 маркали;
• 2019 йил 15 августдан бошлаб Аи-91 маркали;
• 2020 йил 1 майдан бошлаб Аи-80 маркали.

Мазкур автобензин нархини ҳукумат қарори билан белгилаш амалиётидан воз кечилган. Натижада соғлом рақобат муҳити шаклланган ва истеъмолчиларга мақбул нархда сифатли маҳсулотлар етказиб бериш йўлга қўйилган.

Ўзбекистонда ўтган 8 ой давомида қарийб 730 тонна автобензин ишлаб чиқарилган. Импорт қилинган бензин улуши эса 3 баробардан зиёдроқ.

Давлат статистика қўмитасининг келтиришича, Ўзбекистонда 2021 йилнинг 1 сентябрь ҳолатига кўра, жами 729,4 минг тонна автомобиль бензини ишлаб чиқарилган. Худди шу давр мобайнида 281,6 миллион литр автобензин импорт қилинган.

Маълумотларга кўра, автомобиль бензини ишлаб чиқариш ҳажми ўтган йилнинг мос даври билан солиштирилганда 5,1 фоизга ошган. Автомобиль бензини импорти эса ўтган йилнинг мос даврига нисбатан 3,2 бараварга ошган.

Қашқадарёнинг Кўл қишлоғи аҳолиси президент сайловида энг баланд нуқтадан туриб овоз беради. Ушбу участка 765 киши учун ташкил этилган.

Республиканинг энг баланд нуқтаси Ҳазрати Султон чўққиси ҳисобланиб, денгиз сатҳидан 4646 метр баландда жойлашган. Унга яқин аҳоли яшаш пункти Шаҳрисабз туманидаги Кўл қишлоғи бўлиб, қишлоқ ва чўққи ўртасидаги масофа 18 километрни ташкил қилади. Мутахассисларга кўра, қишлоқ денгиз сатҳидан қарийб 2400 метр баландликда жойлашган.

Марказий сайлов комиссиясининг қайд этишича, 765 нафар сайловчи шу қишлоқдаги 64-мактаб биносида ташкил қилинган 920-сайлов участкасида овоз беришда иштирок этади. Уларнинг 27 нафарини сайловда илк марта қатнашаётган ёшлар ташкил қилади.

Ўзбекистонда 87 минг нафардан ортиқ бола «Pfizer/BioNTech» вакцинаси билан ихтиёрий равишда эмланди. 5 октябрь ҳолатига кўра, республикада 87 710 нафар 12 ёшдан 18 ёшгача бўлган бола «Pfizer» вакцинаси билан ихтиёрий равишда эмланган.

Хоразмда мактаб директори ўқитувчи ва ўқувчиларга ғишт ташиттиргани айтилмоқда. Меҳнат вазирлиги вазиятни назоратга олди.

Меҳнат вазирлиги ижтимоий тармоқларда тарқалган «мактаб директори ўқитувчи ва ўқувчиларга ғишт ташиттирди» мазмунидаги хабарга муносабат билдирди.

Қайд этилишича, бу ҳолат юзасидан Хоразм вилояти прокуратураси ҳамда Хоразм вилояти Бандлик бош бошқармаси Давлат меҳнат инспекцияси томонидан ўрганиш ишлари бошланган. Вазирлик ўрганиш якунлари бўйича қўшимча маълумот тақдим этишини маълум қилган. 

Кутамиз, кузатамиз. Унгача «Bugun.uz» колумнисти Ҳабибулло Мўйдинов чизган карикатурани томоша қилинг.

Хўш, оламда нима гап?

Коронавирус юқтирмасликнинг «путинча» йўли — «Спутник V». Россия президенти Владимир Путин қандай қилиб коронавирусга чалинмаганини айтиб берди.

Давлат раҳбарининг айтишича, у коронавирусни юқтириб олган кўплаб одамлар билан гаплашган. Аммо хасталикка чалинмаган. «Мен касалликка чалинмадим ва умид қиламанки, келажакда ҳам уни юқтириб олмайман. Ўйлашимча, бунда ‘Спутник Vʼ катта ёрдам берган», — дея таъкидлаган Путин.

Хитой Халқ Республикаси раиси Си Цзинпиннинг баёноти «Ғарб демократиясини бузиш» деб баҳоланди.

Келтирилишича, Си Цзинпин махсус умумхалқ йиғилишида Хитой инсоннинг шахсий ва профессионал ресурсларини ривожлантириш бўйича дунёдаги энг йирик марказга айланишини айтган.

«Яқин келажакда Хитой инновация соҳасининг асосий йўналишларида фаолият олиб борадиган дунёнинг энг кучли ақл эгалари учун магнитга айланади. Бу жараённи амалга ошириш бўйича дастур ишлаб чиқилмоқда. Биз Хитойни техник даҳоларни тарбиялашда етакчи қилиш учун қўлимиздан келганини қиламиз», — деган у.

Ўз навбатида, таҳлилчилар ҳамма одамларнинг тенглиги шароитида Хитой эълон қилган тамойил Ғарб демократиясининг асосий қоидаларига зидлигини қайд этган.

Бугун билан яшанг. «Бугун»да қолинг.