Бугун, 19 сентябр куни Президент Шавкат Мирзиёев АҚШга ташрифи доирасида  Қўшма Штатларда яшаётган ва ишлаётган бир гуруҳ ўзбекистонликлар ҳамда ушбу мамлакатнинг етакчи олий таълим даргоҳларида таҳсил олаётган «Эл-юрт умиди» жамғармаси стипендиантлари билан учрашди. Бу ҳақда Президент матбуот хизмати хабар берди.

Маълум бўлишича, дастлаб Президент Янги Ўзбекистон тараққиёт стратегияси тўғрисида сўзлаб берган ва ўзбекистонликлар билан алоқаларни мустаҳкамлаш, уларнинг жамоат бирлашмалари фаолиятини қўллаб-қувватлашга қаратилган қатор ташаббусларни илгари сурган.

Хусусан, хорижда ўзбек тили курсларини ташкил этишга кенг кўмаклашиш,  Ўзбекистоннинг тарихий шаҳарларини зиёрат қилиш учун махсус туризм хизматлари тўпламларини ишлаб чиқиш режалаштирилган.

«Биз таълим, тиббиёт, иқтисодиётда олиб бораётган янгиланишлар натижасини ҳар бир юртдошимиз ўз ҳаётида ҳис қилиши керак. Сизлардек хорижда ўқиган, йирик компанияларда ишлаб, тажриба орттирган юқори малакали мутахассислар ҳам юртимизга қайтиб келиши ва бутун салоҳияти билан Янги Ўзбекистонни барпо этишда иштирок эта олишлари учун барча шароитни яратишимиз керак», – дейди Президент.

Бундан ташқари, катта компанияларда ишлаётган ва нуфузли олий таълим даргоҳларида ўқиётган ўзбекистонликлар ўз фикр ва таклифларини билдирган.