Дам олиш кунлари – 20-21 июлда Ўзбекистон ҳудуди бўйича ҳарорат фони ўзгармайди.

«Ўзгидромет» хабарига кўра, жума куни Ўзбекистон ҳудуди бўйича иссиқ об-ҳаво сақланиб туради, ҳарорат +34…+39 даража, шимолда, жанубда ва чўл ҳудудларда +41 даражагача бўлади. Асосан ёғингарчиликсиз об-ҳаво бўлиши кутилмоқда.

Шанба, якшанба кунлари ҳарорат кечалари +20…+25 даража, кундуз кунлари +32…+38 даража иссиқ атрофида бўлади. Республика текислик ҳудудининг катта қисмида ёғингарчилик кутилмайди.

Шарқий йўналишдаги шамол 7−12 м/с тезликда эсади, баъзи жойларда 13−18 м/с гача кучайиши, айрим жойларда чанг-тўзонлар билан кузатилиши мумкин. Тоғли ҳудудларда беқарор об-ҳаво сақланиб туради, баъзи жойларда қисқа муддатли жала ёғиб ўтади, момақалдироқ бўлади. Республиканинг тоғолди ва тоғли ҳудудларида сел-сув тошқин ҳодисалари юзага келиши мумкин.

Пойтахтда жума кунининг иккинчи ярмида ҳаво бироз булутли, баъзи жойларда ўзгарувчан бўлади. Ҳарорат +35…+38 даража иссиқ бўлади.

Шанба ва якшанба кунлари ёғингарчилик кутилмайди. Ҳарорат кечалари +20…+25  даража, кундуз кунлари +34…+38 даража иссиқ бўлади. Шамол шарқдан 5−10 м/с тезликда эсади, 18−23 м/с гача кучайиши мумкин.