Маданият вазирлиги концерт сценарийларини миллий қадриятларга мувофиқлигини текширтиришни мажбурий қилмоқчи.

Таклиф этилаётган лойиҳага кўра, концерт-томоша ташкилотчиси ўтказиладиган тадбирининг батафсил тафсилотларигача ёритиб берилган аниқ сценарийсини «Ўзбекконцерт»га тақдим этиши мажбурий қилиниши мумкин. Қайд этилишича, шу йўл билан маданият вазирлиги миллий анъаналарга зид хатти-ҳаракатларни олдини олишни мақсад қилган.

Тадбир ташкилотчиларидан аризани кўриб чиқиш учун тегишли тартибда йиғим ундирилиши ҳам белгиланмоқда. Сценарийларни миллий анъаналарга мослигини текширтириш Тошкентда ўтказиладиган тадбирлар учун 5 БРВ (1,875 млн сўм), вилоятларда 3 БРВ (1,125 млн сўм) ва бошқа ҳудудларда 1 БРВ (375 тысяч сўм) миқдорда бўлади.

Ариза 30 кун ичида кўриб чиқилади. «Ўзбекконцерт»га тадбир жойига чиқиб, текширишлар ўтказиш ваколати ҳам берилмоқда. Сценарийнинг 10% дан ортиқ қисмига ўзгартириш талаб қилинса ариза ташкилотчига қайтарилади.

Фармон концерт ва бошқа оммавий тадбирларнинг маданий савиясини ошириш, миллий қадриятларни ҳимоя қилиш, оммавий тадбирларда маънавий ва тартибли хатти-ҳаракатларни таъминлашга қаратилган.

Лойиҳа муҳокамаси 5 октябргача давом этади.

Қайд этиш керак, ҳозирда рухсатларни фақат ИИВ ва унинг ҳудудий бўлимлари беради. Энди бу жараёнга «Ўзбекконцерт» ҳам қўшилади, улар барча ҳужжатлар, шу жумладан сценарийни ҳам бир вақтнинг ўзида кўриб чиқишлари керак бўлади.