Андижон вилояти ҳокимлиги Шаҳрихон туманида автомобиль йўли четидаги дарахтлар ноқонуний кесилгани айтилган видеога муносабат билдирди.

Маълум қилинишича, ҳолат Экология ва атроф-муҳитни муҳофаза қилиш бошқармаси масъуллари томонидан жойига бориб ўрганилган. Ўрганиш давомида Шаҳрихон тумани «Қўрғонча» МФЙ ҳудудидан ўтган А373 Андижон—Тошкент автомагистраль йўлининг ўнг қирғоғида жойлашган арча манзарали қимматбаҳо дарахтларнинг 28 тупи тегишли тартибда рухсатнома олмасдан туман ободонлаштириш бошқармаси маъсул шахслари томонидан кесиб юборилгани аниқланган.

Мазкур ҳолатда «Ўсимлик дунёсини муҳофаза қилиш ва ундан фойдаланиш тўғрисида»ги қонун ва «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасида рухсат бериш тартибини янада такомиллаштириш тўғрисида»ги қарорига асосан ўсимлик дунёсига етказилган зарарни ундириш миқдорини ҳисоб-китоб қилинганда кўп миқдорда зарар етказилган.

Мазкур ҳолат вилоят ҳокимлиги назоратида ўрганилиб, қонуний баҳо бериш учун туман прокуратурасига юборилган.

Аввалроқ Тошкент шаҳри Чилонзор тумани ҳудудида юзлаб дарахтларнинг илдизи шикастлангани ва бунинг ортидан туман ҳокими ва прокурори ишдан олингани тўғрисида хабар берилганди. Шунингдек,  Сирдарёда дарахтлар таги бетонлаб ташлангани маълум бўлганди.