АҚШ Ўзбекистоннинг «Оҳангаронцемент» заводи ҳамда 2022 йил бошида заводнинг 98,6 фоиз акциясини сотиб олган Алишер Усмоновнинг USM ҳолдинги томонидан ташкил этилган Akkermann Cement CA’га қарши санкциялар киритди. Бу ҳақда АҚШ Молия вазирлиги сайтида маълум қилинди.

Кипрнинг Lamanka Enterprises компанияси 2021 йил май ойида «Оҳангаронцемент» заводи устав капиталидаги 84,197 фоиз улушни сотиб олганди. Битим суммаси 557,6 миллиард сўмга баҳоланган. 2022 йил январь ойида Британия Виржиния оролларининг Giacinttar ва Lamanka Enterprises компаниялари «Оҳангаронцемент»даги улушларини 1,88 триллион сўмга сотди. Уни Алишер Усмоновнинг USM ҳолдинги томонидан ташкил этилган Akkermann Cement CA компанияси сотиб олганди.

АҚШ Молия вазирлигининг Чет эл активларини назорат қилиш бошқармаси (OFAC) янги санкциялар рўйхатига киритилган бир қатор компаниялар, жумладан, Akkermann Cement CA билан операцияларни 11 июлгача тугатиш талабини қўйган.

«Усмоновнинг ихтиёрида кенг оффшор корхоналар тармоғи мавжуд ва у оила аъзолари орқали молиявий операцияларни амалга ошириши мумкин, бу эса унга санкцияларни четлаб ўтишга имкон беради», дея маълум қилди АҚШ Молия вазирлиги.

OFAC жисмоний ва юридик шахсларни миллий хавфсизлик, ташқи сиёсат ва санкциялар мақсадида ушбу рўйхатга (SDN List) жойлаштиради. SDN рўйхатидаги компанияларнинг активлари блокланади. Америка фуқаролари ва шахсларига улар билан ҳар қандай бизнес ёки битимлар олиб бориш тақиқланади.

АҚШ ҳукуматининг янги санкциялар пакетидан россиялик миллиардер Алишер Усмоновга қарашли USM ҳолдинги ҳамда унинг таркибидаги «Металлоинвест», «Мегафон» компанияларига қарши чекловлар ҳам жой олган.

Аввалроқ Буюк Британия Алишер Усмоновга тегишли USM холдингига санкция қўллагани ҳақида хабар берилганди. USM тўғридан-тўғри ёки билвосита «Россия ҳукумати кўмагидан манфаатдор бўлган шахс, яъни Алишер Усмоновга» тегишли экани ёки назорат қилиниши ҳамда USM «Россия ҳукумати учун стратегик аҳамиятга эга бўлган соҳаларда, яъни Россия кончилик сектори ва алоқа ва рақамли технологиялар секторида бизнес юритиши санкцияга асос сифатида кўрсатилган. Бундан ташқари, Буюк Британия ҳукумати Усмоновга алоқадор деб ҳисоблаган яна икки компания ҳам санкцияларга учраган: Curzon Square Limited ва Hanley Limited.