Шавкат Мирзиёев 30 сентябрь мактабгача таълимни ислоҳ қилиш бўйича фармон имзолади. Фармон мактабгача таълим сифати ва самарадорлигини оширишга қаратилган қатор чора-тадбирларни қамраб олади.

Фармонда келтирилган асосий чоралар ҳақида

• Кичик ва ўрта гуруҳлар. Болаларнинг когнитив, психомотор ва ижтимоий кўникмаларини ривожлантиришга урғу берилади.
• 2025 йилдан бошлаб ҳар бир туман ва шаҳарда таянч мактабгача таълим ташкилотлари ташкил этилади. Улар мактабгача таълим жараёнларини такомиллаштиришда асосий роль ўйнайди.
• Малака ошириш. Барча мактабгача таълим ташкилотларида «Методик маҳорат соати», таянч ташкилотларда эса «Методик маҳорат куни» жорий этилади;
• Технологиялар жорий этилиши. 2026 йилдан бошлаб болаларнинг ривожланиш харитасини юритиш ва уларнинг мактабга тайёргарлик даражасини баҳолаш бўйича электрон сертификатлар бериш йўлга қўйилади.

2025 йилдан бошлаб:

• Мактабгача таълим ташкилотларида инклюзив гуруҳлар очилади.
• Мобил малака ошириш хизматлари жорий қилинади, узоқ ва чекка ҳудудлар учун алоҳида эътибор қаратилади.
• Тренер сифатида фаолият юритаётган директор ўринбосарлари учун қўшимча ойлик устама ҳақ тўланади.

Давлат-хусусий шериклик ҳақида

Давлат ва хусусий боғчалар ўртасида ҳамкорликни ривожлантириш учун янги шартлар яратилади. Хусусий боғчаларни ташкил этиш учун 2018−2022 йилларда берилган кредитларнинг қайтариш муддати 5 йилгача узайтирилади.

Рақамлаштириш ва электрон ресурслар ҳақида

2025 йилгача барча мактабгача таълим муассасаларига давлат таълим дастури асосида ишлаб чиқилган электрон ва аудиовизуал ўқув ресурслари жойлаштирилади. Шунингдек, ота-оналар учун шахсий кабинет яратилади, у ерда болаларнинг ривожланишини кузатиш мумкин бўлади.

Янги лавозимлар ва педагоглар рағбатлантирилиши ҳақида

2025 йилдан мактабгача таълим ташкилотларида директор ўринбосари лавозими жорий этилади. Педагог ва раҳбар кадрлар Мактабгача ва мактаб таълими вазирлиги жамғармаси ҳисобидан рағбатлантирилади.

Фармон таълимнинг сифатини ошириш ва келажакда болаларнинг ривожланишига замонавий ёндашувларни жорий қилишга қаратилган.