Буюк Британия Россия компаниялари ва россияликларга нисбатан санкциялари рўйхатини кенгайтирди. Бу ҳақда мамлакат Ғазначилиги (Молия вазирлиги) молиявий санкцияларни қўллаш бўйича идораси хабарномасида маълум қилинди.

Рўйхатга бир қанча россиялик миллиардерларнинг қариндошлари ҳам киритилган. Хусусан, давлат Думаси депутати ва миллиардер Андрей Скочнинг отаси Владимир Скоч, шунингдек, тадбиркор Варваранинг қизи. Улар биргаликда парламентарийнинг активларига эгалик қилади (USM’даги улуши — 30 фоиз, Внуково аэропортида — 61,5 фоиз). Forbes 2023 йилда Андрей Скоч ва унинг оиласининг бойлигини 7,9 миллиард долларга баҳолаган (энг бой россияликлар рўйхатида 20-ўрин).

Бундан ташқари, «Система» АМК (акциядорлик молия корпорацияси) асосчиси Владимир Евтушенковнинг рафиқаси (2023 йилда 1,7 миллиард доллар, рейтингда 67-ўрин) Наталя ва тадбиркорнинг фарзандлари — Татяна ва Феликс Евтушенковларга ҳам санкция қўлланилган.

•Рўйхатда Федерация Кенгашининг доғистонлик аъзоси, миллиардер Сулаймон Каримовнинг қизи (2023 йилда 10,5 миллиард доллар, рейтингда 13-ўрин) Гулнора Каримова ва Швейцарияда яшовчи собиқ матбуот вазирининг фамилиядоши Наримон Гажиев ҳам бор. Forbes манбалари уни Каримовнинг қариндоши деб атаган.

Шунингдек, Владимир Путиннинг чўқинтирган отаси Виктор Медведчукнинг рафиқаси Оксана Марченко ҳам санкциялар рўйхатига киритилган.

Рўйхатда Кипрда туғилган икки корпоратив адвокат Кристодулос Вассилиадес ва Деметрис Иоаннидес ҳам бор. Биринчиси миллиардер Алишер Усмонов билан ҳамкорлик қилгани учун санкциялар рўйхатига киритилган (2023 йилда 14,4 миллиард доллар, рейтингда 8-ўрин), иккинчиси — миллиардер Роман Абрамовичга хизмат кўрсатгани учун (9,2 миллиард доллар, рейтингда 16-ўрин).

Усмонов асос солган USM холдинги ҳам Британия санкциялари остида қолган. USM тўғридан-тўғри ёки билвосита «Россия ҳукумати кўмагидан манфаатдор бўлган шахс, яъни Алишер Усмоновга» тегишли экани ёки назорат қилиниши ҳамда USM «Россия ҳукумати учун стратегик аҳамиятга эга бўлган соҳаларда, яъни Россия кончилик сектори ва алоқа ва рақамли технологиялар секторида бизнес юритиши санкцияга асос сифатида кўрсатилган. Бундан ташқари, Буюк Британия ҳукумати Усмоновга алоқадор деб ҳисоблаган яна икки компания ҳам санкцияларга учраган: Curzon Square Limited ва Hanley Limited. Тўртинчи компания Meritservus HC Limited — ушбу компанияни Британия ҳукумати Абрамович билан боғлаган.

Умуман олганда, ҳозирда Буюк Британиянинг санкциялар рўйхатида 1559 нафар жисмоний ва 184 нафар юридик шахс бор. Буюк Британияда санкция қўлланган шахсларнинг мол-мулки ва маблағлари музлатиб қўйилади.

Буюк Британиядан ташқари, Россия ташкилотлари ва россияликларга қарши санкциялар АҚШ, Европа Иттифоқи ва бошқа қатор давлатлар томонидан ҳам киритилган. Владимир Путин барча бир томонлама санкцияларни ноқонуний деб атади.