Тошкент вилояти Чиноз туманида ўз келинига шилқимлик қилган қайнотага нисбатан 3 сутка маъмурий қамоқ жазоси тайинланди. Bugun.uz суд қарори билан танишди.

Маълумотларга кўра, 1954 йилда туғилган М.К. 2024 йил 27 июн куни соат 17:30ларда келини М.Н.ни ишхонаси ёнидан машинасига миндириб, уйга олиб кетаётганида унга шаҳвоний шилқимлик қилган. Қайнота келинининг шаъни ва қадр-қимматини таҳқирлаб, номақбул хатти-ҳаракатларни содир қилган.

Ҳуқуқбузар судда айбига иқрорлик билдириб, кўрсатма берган.

«Ўша куни келинимни ишдан уйга олиб келаётганимда машинани йўл четида тўхтатдим. Чанг текканини айтиб, унинг қўлидан ушладим, сўнгра яхши кўришимни, бу хақда ўғлимнинг ҳам хабари борлигини айтдим. Ҳозирда қилган ишимдан пушаймонман», — деган у.

Эркак суддан оилавий шароити оғирлигини инобатга олиб, енгиллик беришни сўраган.

Жабрланувчи эса ўша куни ишдан чиққанида қайнотасини кўрганини, қайнотаси унга уйга олиб бориб қўйишини айтганини маълум қилган.

«Йўлда машинани тўхтатиб, қўлимдан ушлади ва яхши кўришини, агар иш жойимдан рухсат олсам Самарқанд шаҳрига олиб бориб, айлантириб келишини айтди. Қўлимни тортиб олиб, уйга олиб бориб қўйишини айтдим. Аммо уйга келгач ҳолатни ҳеч кимга айтмадим. Эртаси куни яна ишдан чиққан вақтимда қайнотам кутиб турганини кўрдим. Сўнгра уйга келиб, бу ҳолатни турмуш ўртоғимга айтдим. Бироқ турмуш ўртоғим гапимга ишонмади», — деган келин.

Сўнгра у ҳолатни қайнопасига айтган ва унинг телефонидан қайнотасига қўнғироқ қилиб, бир кун олдинги воқеани сўраган. Шунда қайнотаси унга яна шилқимлик қилган. Шундан сўнг турмуш ўртоғи уни қизлик уйига олиб келиб қўйган.

Келинга кўра, ҳозирда у турмуш ўртоғи билан бирга яшамаяпти. Унинг оиласи қайнотаси билан бўлиб ўтган ҳолат сабаб ажралиш ёқасига келиб қолган.

Жиноят ишлари бўйича Чиноз туман судининг 2024 йил 16 июлдаги қарори билан М.К. Маъмурий жавобгарлик тўғрисидаги кодекснинг 41-1-моддасида (шаҳвоний шилқимлик) назарда тутилган ҳуқуқбузарликларни содир қилган деб топилган. Унга нисбатан 3 сутка маъмурий қамоқ жазоси тайинланган.