Шавкат Мирзиёев ва Эммануэл Макрон Самарқандда дарахт экди
Франция президенти Самарқанддаги бундай маросимда қатнашган илк G7 давлати раҳбари бўлди.
Франция президенти Эммануэл Макрон 2 ноябр куни Ўзбекистонда бўлгани ҳақида хабар берилганди. Ташриф давомида у Президент Шавкат Мирзиёев билан Самарқанд шаҳридаги Конгресс марказида дарахт экди.
Давлат раҳбарининг матбуот хизмати хабар беришича, президентлар икки мамлакатни янада яқинлаштириш ва халқлар ўртасидаги дўстликни янада мустаҳкамлашга қатъий интилиш белгиси сифатида дарахт экиш маросимида қатнашган.
Шу тариқа, Эммануэл Макрон «Еттилик гуруҳи» таркибига кирувчи давлатларнинг раҳбарларидан биринчи бўлиб Самарқандда дарахт экди.
Маълумот учун, бунга қадар 2022 йилда Самарқанд шаҳрида ўтказилган ШҲТ саммити, Туркий давлатлар ташкилоти саммити ва бошқа бир қатор дипломатик тадбирлар доирасида Россия, Хитой, Эрон, Туркия, Ҳиндистон, Венгрия, Сингапур, Қатар, Беларус, Озарбайжон, Покистон, Мўғулистон ва Марказий Осиё давлатлари раҳбарлари дарахт экканди. Шунингдек, 2022 йилнинг октябр ойида Европа Кенгаши президенти Шарл Мишел ҳам ушбу рамзий маросимда иштирок этган.
