Эрдўғон туркий халқларни ягона алифбосини жорий этишни таклиф қилди
Президент ТДТга аъзо давлатлар бирлигини мустаҳкамлаш учун тил масаласига эътибор қаратиш зарурлигини таъкидлаган.
Бугун, 3 ноябр куни Туркий давлатлар ташкилотининг Остона шаҳрида саммити бўлиб ўтди.
Ушбу саммитга Туркия президенти Ражаб Эрдўғон, Ўзбекистон президенти Шавкат Мирзиёев, Қирғизистон президенти Садир Жапаров ва Озарбайжон президенти Илҳом Алиев ташриф буюрган. Ташкилотга кузатувчи сифатида кирган Туркманистондан халқ маслиҳати раиси Гурбангули Бердимуҳамедов ва Венгрия бош вазири Виктор Орбан иштирок этган.
Саммитда Туркия президенти Ражаб Тоййиб Эрдўғон туркий халқлар учун ягона алифбо жорий қилишни таклиф қилган.
«Умумий алифбо ҳам муҳим. Бу борада президентларнинг қўллаб-қувватлаши зарур. Олий таълим кенгаши котибиятга тегишли таклиф билан чиқди. Ташкилотимизда бу таклиф диққат билан кўриб чиқилишига ишонаман», — деди Ражаб Тоййиб Эрдўғон.
Шунингдек, президент ташкилотга аъзо давлатларнинг бирлигини мустаҳкамлаш учун тил масаласига эътибор қаратиш зарурлигини таъкидлаган.
Эслатиб ўтамиз, аввалроқ, Туркия президенти аҳолисини Исроилга қарши митингга чақиргани хабар қилинганди.
