АҚШ президенти Жо Байден Европага ташрифи доирасида Киевга келди. Бу ҳақда Украина ОАВлари хабар бермоқда.

Михайловский соборида Америка етакчиси ва Украина президенти Владимир Зеленскийнинг тансоқчилар қуршовида юргани тасвирланган видеолар тарқалди.

«Украинская Правда»нинг ёзишича, Байден уруш давомида ҳалок бўлган украин ҳарбий хизматчилари хотирасига ҳурмат бажо келтириш учун черковга ташриф буюрган. Ҳозирда Киевда ҳаво тревогаси эълон қилинган. Видеоларда икки мамлакат раҳбари ушбу тревога сиреналари остида юрганини кўриш мумкин.

Владимир Зеленский АҚШ президентининг ташрифини расман тасдиқлади: «Жозеф Байден, Киевга хуш келибсиз! Сизнинг ташрифингиз барча украинларни қўллаб-қувватлашда жуда муҳим аҳамиятга эга».

Америка етакчисининг Киевга ташрифи ҳеч ерда эълон қилинмаган эди. Украина ОАВлари 20 февраль тонгидан бошлаб Киев марказига элтувчи йўллар ёпилганини ёзишни бошлаганди, мамлакат ташқи ишлар вазири ўринбосари Андрей Мельник эса Украина пойтахтига «муҳим, асосий шериклар» ташриф буюрганини айтган.

Эслатиб ўтамиз, Владимир Зеленский Россия ҳужуми бошланганидан бери биринчи марта хорижий сафарини амалга оширганди. У 21 декабрь куни Украина етакчиси расмий ташриф билан Вашингтонга борган. Томонлар бир неча ҳафта давомида «саҳна ортида» эҳтимолий ташриф тафсилотларини муҳокама қилган.

Ўшанда Россия Украина етакчисига суиқасд уюштирилиши мумкинлиги хавфи сабаб АҚШда хавфсизлик чоралари кучайтирилган. Юқори мартабали амалдор хавфсизлиги учун Украинанинг АҚШдаги элчихонаси ходимларига ҳам ташриф дастури бўйича маълумот берилмаган. Associated Press маълумотларига кўра, Зеленский Польшанинг Жешув шаҳрига поездда, у ерда АҚШ Ҳарбий-ҳаво кучларининг самолётида Вашингтонга учиб келган.