Москва аэропортлари ва авиакомпанияларида биринчи марта максимал — теракт хавфининг учинчи дажараси эълон қилинди. Бу ҳақда «Ространснадзор»га таяниб «Известия» хабар берди.

Қайд этилишича, Москвадаги «Шереметьево», «Домодедово» ҳамда «Внуково» аэропортларида биринчи марта террорчилик ҳужумлари хавфининг максимал даражаси жорий этилган.

«2022 йил 10 ноябрь соат 00:00 дан бошлаб транспорт комплекси фаолиятига террористик хусусиятга эга бўлган ноқонуний аралашиш ҳаракатини содир этиш билан боғлиқ тўғридан-тўғри таҳдиднинг №3 хавфсизлигига мос даража ўрнатилсин», дейилади хатда.

«Ространснадзор» авиакорхоналарни янги хавф даражасига мувофиқ қўшимча хавфсизлик чораларини қабул қилиш кераклиги ҳақида хабардор қилган.

Россияда транспорт воситалари учун хавфсизликнинг уч даражаси мавжуд. Улар ҳукуматнинг 2344-сон қарори билан белгиланган. Ҳужжатга кўра, биринчи даража транспортга ноқонуний аралашув акти (НАА) потенциал таҳдиди билан жорий этилади. Иккинчи даража бевосита хавф мавжудлигини, яъни аллақачон аниқ шартлар ва омилларни назарда тутади. Учинчиси, энг юқориси, НААни содир этиш хавфини туғдирган тўғридан-тўғри таҳдидлар учун жорий этилади.

Россия Фуқаролик палатаси аъзоси Илья Зотов йўловчиларга Москва аэропортлари ва «Пулково»га олдиндан етиб келишни маслаҳат берган — бу уларга парвозни ўтказиб юбормаслик имконини беради. Қўшимча хавфсизлик чоралари саёҳатчилар учун бошқа қийинчиликларга олиб келмаслиги кераклиги таъкидланган.

Эслатиб ўтамиз, апрель ўрталарида Россия Украина билан чегарадош ҳудудларда юқори теракт хавфини эълон қилганди.