НАТО 2024 йилда Совуқ уруш давридан бери ўзининг энг йирик ҳарбий машғулотларини ўтказишни режалаштирмоқда. Бу ҳақда Financial Times хабар берди.

Қайд этилишича, машғулотлардан мақсад «альянсга аъзо мамлакатлардан бирига қаратилган Россия тажовузини қайтариш» бўлади. The Steadfast Defender машғулотлари альянснинг урушга тайёрлиги намойиши сифатида баҳоланмоқда. Келаси йилнинг феврал ойида бошланадиган машғулотларда 41 минг ҳарбий хизматчи ва 50 дан ортиқ ҳарбий кема иштирок этиши кутилмоқда. Шунингдек, унда 500 дан 700 гача бўлган авиацион жанговар миссиялар ўтказилиши режалаштирилган.

НАТО машғулотлари 2024 йилнинг феврал-март ойлари давомида Польша, Болтиқбўйи давлатлари ва Германияда ўтказилиши мумкин. ТАСС хабарига кўра, машғулотларда альянсга аъзо 31 та мамлакатдан ташқари ҳозирча аъзоликка қабул қилинмаган Швеция ҳам қатнашади.