Сурхондарё вилояти ҳокимияти Ўзбекистон ва Афғонистон чегарасидаги нейтрал ҳудудда жойлашган Амударё ичкарисидаги кичик оролчаларда пайдо бўлган қамишзорларни режали тартибда навбатдаги ёқиш ишлари бошлангани ҳақида маълум қилди.

Тадбир мутасадди идоралар рухсати ҳамда масъул органларнинг ўзаро келишуви асосида амалга оширилиб, оролчалардаги ёнғин ҳаракати ва кўлами тўлиқ назоратга олинган. Қайд қилинишича, қамишзорларни режали ёқиш турли касалликлар ташувчиси ҳисобланган зараркунанда ҳашаротлар кўпайиши ва юқумли касалликлар тарқалишининг олдини олиш мақсадида амалга оширилмоқда.

«Ушбу тадбир ёввойи қамишзорларда белгиланган режага мувофиқ олиб борилаётганини маълум қилиб, фуқаролардан ортиқча ваҳимага берилмасликни, ижтимоий тармоқ фойдаланувчиларидан эса аҳоли ўртасида ваҳима келтириб чиқарувчи ёлғон ахборотларни тарқатмасликни сўраймиз», — дейилади расмий маълумотда.

Маълумот ўрнида аввалроқ, 7-8 феврал кунлари ижтимоий тармоқларда Термиз шаҳри атрофида кучли ёнғин юз бергани тасвирланган фотосуратлар тарқалган эди. Ўшанда ҳокимлик бу борада олдиндан ҳеч қандай ахборот бермаган ва аҳолини «режали тартибда ёқиш ишларидан» хабардор қилмаганди.