Ўзбекистоннинг асосий ташқи савдо ҳамкорлари рўйхати эълон қилинди
Ўзбекистон шу йилнинг икки ойида жаҳоннинг 155 та мамлакати билан савдо қилган
Статистика агентлиги 2023 йилнинг январ-феврал ойларида Ўзбекистон ташқи савдо айланмасидаги топ-10 давлатлар рўйхатини эълон қилди. Ташқи савдо айланмасида юқори улушга эга бўлган ҳамкор давлатлар рўйхатининг юқори поғонасида 1,4 миллиард АҚШ долларлик улуш билан Россия ўрин олган. Туркия давлати 548 миллион АҚШ долларига тенг савдо айланмаси билан рўйхатнинг бешинчи поғонасидан жой олган.
Кўрсаткич давлатлар кесимида қуйидагича кўринишга эга:
- Россия — 1,4 миллиард доллар;
- Хитой — 1,3 миллиард;
- Қозоғистон — 699 миллион;
- Германия — 573 миллион;
- Туркия — 548 миллион;
- Корея — 308 миллион;
- Қирғизистон — 167 миллион;
- Литва — 161 миллион;
- Франция — 152 миллион;
- Швейцария — 131 миллион.
Маълумот ўрнида, 2023 йилнинг икки ойида Ўзбекистоннинг ташқи савдо айланмаси 8,9 миллиард АҚШ долларини ташкил этган. Бу кўрсаткич 2022 йилнинг мос даврига нисбатан 176,4 миллион АҚШ долларига (2 фоизга) ошган. Жаҳоннинг 155 та мамлакати билан савдо қилган Ўзбекистоннинг ташқи савдо айланмаси ҳажмида экспорт 3,2 миллиард АҚШ доллари ҳамда импорт 5,7 миллиард АҚШ долларини ташкил қилган.
