Қозоғистонда НАТО тинчликпарвар операциялар маркази иш бошлади. Бу ҳақда АҚШнинг мамлакатдаги элчихонаси матбуот хизмати маълум қилди.

Қайд этилишича, марказнинг очилиш маросимида АҚШнинг Қозоғистондаги элчиси Даниэл Розенблум иштирок этган. Ушбу марказда Қозоғистон ҳарбийларини НАТО стандартлари бўйича тайёрлаш режалаштирилган. Мамлакатда НАТО тинчликпарвар операциялар марказининг очилиши Қозоғистонда ҳар йили 25 октябрда нишонланадиган Республика куни арафасида ўтказилгани ҳам эътиборга молик, дея баҳоланмоқда. Боиси, Қозоғистонда 1990 йилнинг 25 октябрида мустақиллик декларацияси қабул қилинган бўлиб, ўшандан буён бу сана Республика куни байрами сифатида нишонлаб келинади.

«Элчи Розенблум Қозоғистон тинчлик операциялари марказидаги янги конференция залининг очилиш маросимида иштирок этиш шарафига муяссар бўлди. Бу бино Қозоғистоннинг халқаро тинчликпарвар кучларни тайёрлаш имкониятларини кенгайтириш мақсадида Америка Қўшма Штатлари томонидан қўллаб-қувватланган яна бир лойиҳадир. АҚШ Қозоғистон билан хавфсизлик, фаровонлик ва тинчликни сақлаш манфаатлари йўлида ҳамкорлик қилишдан фахрланади», деб ёзилади элчихона хабарида.

Маълумот учун, Қозоғистон ва НАТО ўртасидаги муносабатлар 1994 йилда ўзаро имзоланган «Тинчлик йўлида ҳамкорлик» ҳужжати ва томонлар ўртасидаги икки томонлама ҳамкорлик дастурига асосланади.