Самарқанд шаҳридаги тўққизта кўп қаватли уй қарийб 9 миллиард 535 миллион сўмлик табиий газдан, иккита кўп қаватли уй эса 64 миллион 800 минг сўмлик электр энергиясидан ноқонуний фойдалангани аниқланган. Бу ҳақда Энергетика вазирлиги матбуот хизмати хабар берди.

Энергетика вазирлиги ҳузуридаги «Ўзэнергоинспекция» томонидан тегишли органлар билан ҳамкорликда ўтказилган текшириш жараёнида Самарқанд шаҳридаги 136-144-сонли тўққизта кўп қаватли уй табиий газ тармоғига Billing дастуридан рўйхатдан ўтмаган ҳолда уланган ва ундан ноқонуний фойдаланиб келаётгани аниқланган.

Ушбу кўп қаватли уйлар «А.Б.» МЧЖ томонидан қурилган бўлиб, дастлабки ҳисоб-китобларга кўра, тизимга қарийб 9 миллиард 535 миллион сўм (25 миллион 90 минг 836 метр куб) зарар етказгани маълум бўлди.

Бундан ташқари, мазкур ҳудуддаги 142-143-сонли кўп қаватли уйлар электр энергиясидан фойдаланиш учун шартнома тузмасдан, PK-uchyot базасида рўйхатдан ўтмасдан, ноқонуний фойдаланиб, тизимга 64 млн 800 минг сўм зарар етказгани аниқланган.

Ушбу ҳолат бўйича қоидабузарга нисбатан белгиланган тартибда чора кўрилиши учун тегишли ҳужжатлар ҳуқуқни муҳофаза қилувчи органларга топширилган.

Эслатиб ўтамиз, аввалроқ, Хоразмда 2 890 та хонадоннинг бир ойлик истеъмолига тенг электрни ноқонуний ишлатган фуқарога чора кўрилгани хабар қилинганди.