Самарқандда уч нафар вояга етмаган фарзандини пичоқлаб ўлдирган эркакка 2023 йил 19 октябр куни суд ҳукми ўқилди. Бу ҳақда “Ёшлар” телеканалида маълум қилинди.

Ҳолат юзасидан вилоят прокуратураси томонидан фуқаро А.Д.га нисбатан Жиноят кодексининг 97-моддаси (қасддан одам ўлдириш) 2-қисм «а» ва «в» бандлари билан жиноят иши қўзғатилганди.

Ушбу жиноят иши ЖИБ Самарқанд шаҳар судида кўриб чиқилди.

Аниқланишича, эркак жиноятни содир этган вақтда ҳеч қандай наркотик моддалар таъсирида бўлмаган.

Суд ҳукмига кўра, судланувчига нисбатан Жиноят кодексининг 97-моддаси (қасддан одам ўлдириш) «а», «в», «ж» бандлари билан умрбод озодликдан маҳрум қилиш жазоси тайинланган.

Эркак нега бу жиноятни содир этгани, аёли билан жанжаллашишининг сабабини қуйидагича изоҳлаган:

«Аёлим бошқа сен билан яшамайман. Болаларни олиб, аямни уйига олиб бориб қўй. Менинг эрим бор, ҳаётим бор, деди. Катта қизим қўлимда жон берди. Кўриб, қўрқиб кетдим. Йиғладим, додладим, кейин ўзимни пичоқладим. Шу билан ҳушимдан кетдим.»

Эслатиб ўтамиз, аввалроқ, Самарқандда эркак хотинидан ўч олиш учун уч фарзандини ўлдиргани хабар қилинганди.