Самарқанднинг Пахтачи туманида 27 октябрь куни 41 ёшли эркак ўзини юк машинасининг тагига ташлади. Бу ҳақда Бош прокуратура матбуот котиби Ҳаёт Шамсутдинов Bugun.uz’га хабар берди.

Маълум бўлишича, воқеа соат 12:30 ларда тумандаги М-37 йўлининг 139 километрида содир бўлган. Хатирчи туманида яшаган, руҳий касал бўлган А.Б. ўзини йўлдан ўтиб кетаётган, Man русумли юк автомашинаси тагига ташлаб жонига қасд қилган. Оқибатда у ҳодиса содир бўлган жойда ҳалок бўлган.

Марҳум 1983 йил 13 ноябрда туғилган бўлиб, Навоий вилоятининг Хатирчи туманида яшаган. У психиатрия диспансерида рўйхатда турган, ажрашган ва фарзанди йўқ бўлган.

Юк автомашинасини бошқарган Й.Й 1992 йилда Хоразм вилоятида туғилган,  ҳайдовчи бўлиб ишлайди ва халқаро юк ташиш билан шуғулланади. У ҳодиса содир бўлган вақтда Қирғизистоннинг Ош шаҳридан Туркманистоннинг Ашхабод шаҳрига юк олиб кетайтган бўлган.

Ҳодиса содир бўлган жой кўздан кечирилиб, ҳолат бўйича суд-тиббий экспертиза тайинланди. Ҳодисага гувоҳ бўлган шахслардан тушунтириш хатлари олинди. Ҳозирда Пахтачи туман прокуратураси томонидан терговга қадар текширув ишлари олиб борилмоқда.