Тошкент метрополитенининг «Ер усти ҳалқа йўли» йўналиши 6 ва 7-бекатлари оралиғидаги ер устки қисмида Фарғона йўли кўчасидан «Қўйлиқ» деҳқон бозори томон қурилаётган автомобил йўл ўтказгичининг қурилиш ишлари якунланаётгани муносабат билан метрополитеннинг 7-бекати (Қўйлиқ) 11–18 март кунлари вақтинча хизмат кўрсатмайди. Бу ҳақда «Тошкент метрополитени» ДУК хабар берди.

Қайд этилишича, «Ер усти ҳалқа йўли» йўналишида поездлар ҳаракати «Дўстлик-2» бекати билан 6-бекат оралиғида ташкил этилади. Йўловчилар учун эса 6 ва 7-бекат оралиғида қўшимча автобус ҳаракати йўлга қўйилади.

Эслатиб ўтамиз, 8 февраль куни Шавкат Мирзиёев 8 февраль куни Тошкент ер усти метроси қурилишининг иккинчи босқичида амалга оширилаётган ишлар билан танишганди. Бугунги кунда Тошкент ер усти метросининг биринчи босқичи ва Сергели йўналишини боғловчи Қўйлиқдан Сергелигача бўлган ер усти йўли барпо этилмоқда. Қарийб 12 километрлик бу қисмда 7 та бекат бўлади. Ҳозирда Қурувчилар даҳасигача борган 5 та бекати қуриб битказилган.