Тошкент шаҳрида ноқонуний қурилма ва иншоотларни демонтаж қилиш ишлари бошланмоқда. Бу ҳақда пойтахт ҳокимлиги ахборот хизмати хабар берди.

Қайд этилишича, айни пайтда Тошкент шаҳрида аҳоли фаровонлигини ошириш, жумладан, коммунал ва йўл инфратузилмасини яхшилаш, йўлларнинг қулайлиги ва хавфсизлигини ошириш, соғлом турмуш тарзи, фаол ҳордиқ чиқариш ва дам олиши учун шарт-шароит яратиш бўйича фаол ишлар амалга оширилмоқда.

Хусусан, ушбу вазифани амалга ошириш доирасида жойларда пиёдалар учун мўлжалланган йўлларнинг қулайлиги таҳлил қилинди. Бунда энг аввал ягона услубсиз ва кўп ҳолларда тегишли шаҳар хизматлари томонидан бериладиган рухсатномаларсиз қурилган бинолар халал бераётгани таъкидланган.

«Йўллар бўйлаб жойлашган бу бинолар аҳоли учун хавф туғдиради, масалан, уларнинг аксариятида тўхташ жойлари ва йўлаклари йўқ, улар пиёдалар йўлакларига чиқиб кетган тарзда ташкил этилган. Шундай қилиб, ҳайдовчининг бир дақиқалик харид қилиш жараёни бошқа ҳайдовчилар учун ҳам, пиёдалар учун ҳам сезиларли ноқулайлик ва хавф туғдиради», — дейилади ҳокимлик хабарида.

Пойтахт ҳокимияти ўз навбатида Тошкент шаҳри ҳудудида маиший ва тижорат биноларига эга бўлган пойтахт аҳолисини ҳужжатларнинг шаҳарсозлик меъёрларига мувофиқлигини яна бир бор синчиклаб текширишга чақирган.

«Тадбиркорлар ва шаҳар аҳолисини ушбу турдаги кўчмас мулкни харид қилишда эҳтиёткор бўлишга, юридик хизматлар билан маслаҳатлашишга чақириш зарур, деб ҳисоблаймиз. Тошкент шаҳар кадастр хизматлари томонидан бериладиган, уларнинг чегаралари, майдони ва биноларнинг турларини тасдиқловчи ҳужжатлардан ташқари, бино ва иншоотлар учун ҳужжатларнинг муқобил турлари мавжуд эмас», — дейилади баёнотда.

Ҳокимликнинг таъкидлашича, потенциал хариднинг барча тафсилотларини аниқлаштириш учун ваколатли органларга шахсан ёки онлайн давлат хизматлари орқали мурожаат қилиш зарур. Фақат ишончли ва расмий маълумот манбаларига ишонч билдириш, аниқ маълумот учун 71 210-01-63 телефон рақами ёки ижтимоий тармоқлар орқали пойтахт ҳокимлиги матбуот хизматига мурожаат қилиш лозим.