Украинанинг Донетск вилоятидаги Россия қўшинлари томонидан босиб олинган Волноваха шаҳрида тўққиз киши, жумладан, икки нафар вояга етмаган бола отиб ўлдирилган. Бу ҳақда Россия Тергов қўмитаси хабар берган.

Уй эгаларининг узоқ қариндошининг сўзларига кўра, воқеа 27 октябр куни содир бўлган. Уйда эр ва хотин ҳамда уларнинг бошланғич мактабда ўқийдиган қизи ва тўрт ёшли ўғли яшаган.

Ушбу қотилликка нима сабаб бўлгани маълум эмас. Жиноятчилар бутун оилани ва уйда бўлган яна беш кишини отиб ташлашган.

Шунингдек, далилларни яшириш учун уйга сув бостирилган.

Россия Тергов қўмитасининг Донетск Халқ республикаси бўйича тергов органлари ушбу қотиллик ҳолатларини ўрганмоқда.

Мазкур ҳолат юзасидан Россия Жиноят кодексининг 105-моддаси (икки ва ундан ортиқ одамни, шу жумладан, вояга етмаганларни ўлдириш) 2-қисм «а» ва «в» бандлари бўйича жиноий иш қўзғатилган.

Ҳозирда ушбу жиноятни содир этишга алоқадор бўлган шахслар аниқланмоқда.