«Зики эски шаҳар» қамалди

«Зики эски шаҳар» лақаби билан танилган Лутфилла Умаров 6 йил 2 ойга қамалди.

Ўзбекистонда криминоген вазиятни яхшилаш учун 2023 йилнинг ноябрь ва декабрь ойларида ўтказилган «долзарб 40 кунлик» рейд тадбирида қўлга олинган жиноятчилардан бири «Зики эски шаҳар» лақабли Лутфилла Умаровга нисбатан суд ҳукми ўқилди. Бу ҳақда Тошкент шаҳар судлари Матбуот котиби Bugun.uz’га хабар берди.

Маълум қилинишиа, 2024 йилнинг 19 апрель куни жиноят ишлари бўйича Шайхонтоҳур туман судида ЖКнинг 273-моддаси (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 2-қисми билан айбланиб судланаётган Лутфилла Умаровга оид суд иши кўриб чиқилди.

Аниқланишича, 2023 йил май ойининг охирларида Тошкент шаҳри Шайхонтоҳур тумани Катта Оқтепа маҳалласи ҳудудидаги жарлик ёқасидан 12 дона кўкнори бошоқларини топиб, уларни келгусида ўтказиш мақсадида таниши Н.Н.га сақлаб туриш учун берган. 2023 йил 7 декабрь куни ҳуқуқни муҳофаза қилувчи органлар ходимлари томонидан Н.Н.нинг Тошкент шаҳар, Шайхонтоҳур туманидаги яшаш хонадонида тинтув ўтказилди.

Ўтказилган тинтув давомида, унинг хонадонидан гиёҳвандлик воситалари топилиб, ашёвий далил тариқасида расмийлаштириб олинган. Судга оид кимёвий экспертизасининг 2023 йил 8 декабрдаги 3154-сонли хулосасига кўра, таркибида опий гуруҳига мансуб бўлган алколоидлар (кодеин, тебаин) мавжуд бўлган, умумий вазни 9,64 граммни ташкил қилувчи «кўкнори бошоғи» эканлиги маълум бўлган.

Суд ҳукмига кўра, Умаров ЖКнинг 273-моддаси 2-қисми билан айбдор деб топилди ва унга 6 йил 2 ой муддатга озодликдан маҳрум қилиш жазоси тайинланди.

Эслатиб ўтамиз, Bugun.uz манбаларига таяниб, Ўзбекистон махсус хизмати томонидан бутун мамлакат бўйлаб ўтказилган йирик операция давомида турли жиноий гуруҳларнинг юзлаб оддий ва юқори мартабали аъзолари, жумладан, «криминал авторитет»лар панжара ортига жойлаштирилгани ҳақда хабар берганди.

Хусусан, Ўзбекистон жиноят олами етакчиси деб қараладиган, «Вор в законе» Бахти Ташкентский, шунингдек, унга яқин одамлар ҳам қўлга олинган.

Мазкур рейдлар «Ҳумо» аренасидаги тартибсизликлар фонида Тошкентдаги ҳуқуқни муҳофаза қилувчи идоралар ҳамкорлигида ўтказилган.

Махсус хизматлар тергов давомида Миллий гвардия билан тўқнашув иштирокчилари орасида Тошкент ва Ўзбекистоннинг бошқа шаҳарларидан келган жиноий гуруҳларининг кўплаб вакиллари борлигини аниқлаган. Шунингдек, тезкор ходимларнинг сўзларига кўра, айнан мафия қалбаки чипталар савдоси билан боғлиқ бўлган.

Маълумотларга кўра, Jah Khalib концертига жами 12 минг киши келган, бироқ атиги 9 минг киши ҳақиқий чиптага эга бўлган, қолган чипталар сохта бўлган.

Bugun.uz манбасига кўра, махсус операцияга тайёргарлик бир неча ой олдин бошланган ҳамда махсус хизматлар рейднинг барча деталларини аниқ ишлаб чиққан бўлган.

Humo arena яқинидаги тартибсизликлардан сўнг республиканинг барча ҳуқуқ-тартибот идоралари раҳбарияти билан бир неча бор ёпиқ мажлислар ўтказилиб, махсус операцияни тезлаштиришга қарор қабул қилинган ва кенг кўламли тозалаш операцияси бошланган.

Миллий гвардия расмий муносабатида мафия вакиллари билан тўқнашувлар содир бўлганини рад этган эди.

Bugun.uz махсус операциянинг барча тафсилотларини қўлга киритиб, Ўзбекистон бўйлаб махсус хизмат томонидан ўтказилган рейдлар давомида жиноий гуруҳларнинг 200 дан ортиқ аъзолари, асосий раҳбарлари қўлга олинганидан хабар топди.

Нашрнинг ишончли манбаларига кўра, мамлакат ҳуқуқ-тартибот идоралари мамлакатда кучайиб бораётган жиноий олам вакилларига қарши кескин чораларни қўллашни маълум вақтдан бери режалаштириб келган. Бунга хавфсизлик кучларининг ўз агентларидан олган маълумотлари, шунингдек, турли соҳалардаги тадбиркорларнинг «кўча болларидан» босим бўлаётгани ҳақидаги кўплаб мурожаатлари сабаб бўлган.

Bugun.uz’даги мавжуд маълумотларга кўра, жиноятчилар ноқонуний қиморхоналарни тўлиқ назорат қилган. Улар ичида ҳатто ноқонуний ўйин автоматлари жойлашган казинолар ҳамда фақат тор доирадаги одамлар кириши мумкин бўлган покер клублари бўлган.

Айниқса, куч ишлатар идораларни жиноятчилар турли мансабдорларга пора бериб, уларни «сотиб олиши» орқали коррупциянинг ривожланишига ҳисса қўшиши жиғибийрон қилган. Тадбиркорлар эса асосан 90-йилларда қолиб кетган шантаж, товламачилик ва рэкетдан шикоят қилишган. Қайд этилишича, тошкентлик йирик тадбиркорлардан бири ҳам мафиянинг товламачилик ўйинлари қурбони бўлган. Жиноятчилар унинг асосий бизнесидан улуш ҳамда бошқа бир лойиҳаларидан «доля» талаб қилишган (Тадбиркорнинг исми Bugun.uz нашрига маълум бўлишига қарамасдан, ушбу маълумот тергов жараёнларига таъсир қилмаслиги учун унинг исми тилга олинмайди).

Суриштирувлар жиноят оламининг энг юқори чўққисида ўтирган – «Бахти Ташкентский» ва унинг укаси Дилшодга олиб борган. Бахти тадбиркорлардан ўлпон ундиришни йўлга қўйган.

Бу ака-укадан ташқари, жиноий оламнинг бошқа «кўзга кўринган» шахслари ҳам махсус хизматлар томонидан аниқ ва пухта режалаштирилган операция давомида қўлига олинган. Хусусан, ОАВларда «Саидаз Медгородок» лақаби билан машҳур Саидазиз Саидалиев ва унинг шериклари ҳам ҳибсга олинган.

Шу жумладан «криминал авторитет» Баҳодир Султонов — «Боҳо завхоз» ҳам қўлга олинган. Боҳо, том маънода унинг «штаб-квартирасида», чойхонада қўлга олинган. У ушбу чойхонага мунтазам равишда ташриф буюриб, ишларини шу ердан бошқариб, учрашувларни ҳам шу ерда ўтказиб келган.

Мавзуга доир хабарлар билан танишинг: